2026-cı il Dünya çempionatının 1/8 final mərhələsində Argentina ilə Misir arasında keçirilən dramatik qarşılaşmadan sonra turnirin ilk böyük hakim qalmaqalı yaşanıb.

AVESTA.AZ-in məlumatına görə, 2:0 hesabı ilə irəlidə olan Misir son 11 dəqiqədə üstünlüyünü əldən verərək Lionel Messinin liderlik etdiyi Argentinaya 2:3 hesabı ilə məğlub olub.

Dünya çempionları Kristian Romero, Lionel Messi və Enso Fernandesin qolları sayəsində əzmkar qələbə qazanaraq 1/4 finala yüksəlib.

Lakin matçın yekunundan sonra əsas müzakirə mövzusu nəticədən çox hakim Fransua Leteksyenin idarəçiliyi olub. Misir tərəfi qarşılaşma ərzində bir neçə epizodda hakim qərarlarının onların əleyhinə verildiyini iddia edib.

Ən çox narazılıq doğuran məqam VAR müdaxiləsindən sonra Mustafa Zikonun qolunun ləğv edilməsi və argentinalıların qələbə qolundan əvvəl Misir futbolçusuna qarşı qayda pozuntusunun qeydə alınmaması olub. Misir futbolçuları hesab edirlər ki, həmin epizodda penalti təyin edilməli idi.

Final fitindən sonra Misirin məşqçilər korpusu hakimlərin üzərinə etiraz üçün hərəkət edib. Qapıçılar üzrə məşqçi Saafan Əl-Səğir qırmızı vərəqə alıb və təhlükəsizlik əməkdaşları ilə komanda üzvləri onu sakitləşdirmək üçün müdaxilə ediblər. Baş məşqçi Hossam Həsən də etirazlarına görə sarı vərəqə ilə cəzalandırılıb. Xarici KİV-lərin məlumatına görə, sosial şəbəkələrdə yayılan "Messi ilə dava etməyə qaçdı" iddiası rəsmi şəkildə təsdiqini tapmayıb.

Qarşılaşmadan sonra Hossam Həsən hakimliyi sərt tənqid edib və komandasının "ədalətsizliklə üzləşdiyini" bildirib.

"Bu nəticənin ədalətli olduğuna inanmıram. Matçın gedişində baş verənlər bizi qane etmir. Futbolçularım hər şeyi etdilər, lakin bəzi qərarlar oyunun taleyinə birbaşa təsir göstərdi", – deyə Misir millisinin çalışdırıcısı vurğulayıb.

Misir Futbol Assosiasiyası isə bununla kifayətlənməyərək FIFA-ya rəsmi şikayət ünvanlayıb. Federasiya fransalı hakim Fransua Leteksye və onun briqadasının fəaliyyətinin araşdırılmasını, həmçinin həmin hakimlər briqadasının dünya çempionatının qalan oyunlarından uzaqlaşdırılmasını istəyib.

Bəzi beynəlxalq nəşrlər yazır ki, Misir tərəfi xüsusilə iki epizodun - ləğv edilən qolun və Argentinanın qələbə qolundan əvvəl mümkün qayda pozuntusunun - matçın nəticəsinə həlledici təsir göstərdiyini hesab edir. Hətta baş məşqçi Hossam Həsən emosional açıqlamasında FIFA-nın dünya çempionlarını və Lionel Messini turnirdə saxlamaqda maraqlı olduğunu iddia edib. Bununla belə, bu fikirlər yalnız Misir tərəfinin mövqeyidir və FIFA tərəfindən təsdiqlənməyib.

Beləliklə, Argentina 1/4 finala yüksəlsə də, bu qarşılaşma təkcə dramatik geri dönüşü ilə deyil, həm də hakim qərarları ətrafında yaranan mübahisələrlə 2026-cı il dünya çempionatının ən çox müzakirə olunan oyunlarından birinə çevrilib.