Dövlət İmtahan Mərkəzi ali təhsil müəssisələrinə II və III ixtisas qrupları üzrə qəbul imtahanlarının nəticələrini elan edib. II ixtisas qrupu üzrə ən yüksək nəticəni Sumqayıt şəhər 35 nömrəli tam orta məktəbin məzunu Zamin Kərimov göstərib.

O, qəbul imtahanının birinci mərhələsində 297.5, ikinci mərhələsində isə 392.5 bal toplayaraq ümumilikdə 690 bala yiyələnib.

AVESTA.AZ xəbər verir ki.ş təəssüratlarını Oxu.Az-a bölüşən Zamin Kərimov bildirib ki, yüksək nəticə göstərəcəyinə inamı olub:

"Bu, çox xoş hissdir. Sözlə ifadə edə bilmirəm. Nəticəni evdə öyrəndim".

O qeyd edib ki, buraxılış imtahanında itirdiyi balların əsas səbəbi diqqətsizlik olub və blok imtahanında bunu kompensasiya edəcəyinə inanıb:

"Bilirdim ki, düzəldəcəyəm. Çünki balları diqqətsizliyə görə itirmişdim".

Hazırlıq prosesində xüsusi metoddan istifadə etmədiyini deyən abituriyent uğurun əsas sirrinin davamlı zəhmət olduğunu vurğulayıb:

"Elə bir xüsusi metodum olmayıb. Sadəcə, çox çalışmışam. Yüksək nəticə üçün həm zəhmət, həm sistemli hazırlıq, həm də əzm lazımdır".

Zamin Kərimov bildirib ki, hazırlıq müddətində motivasiyasını heç vaxt itirməyib:

"Heç vaxt alınmayacağını düşünməmişəm. Həmişə nəticə əldə edəcəyimə inanmışam və buna görə də hazırlığımı davam etdirmişəm".

O əlavə edib ki, bir çox abituriyentdən fərqli olaraq sosial həyatdan tam uzaqlaşmayıb:

"Normal həyatımı davam etdirmişəm. Telefondan da çox uzaq qalmamışam".

Gələcəkdə maliyyə ixtisası üzrə təhsil almaq istədiyini deyən Z.Kərimov bu sahəyə marağının olduğunu bildirib. Abituriyent qazandığı uğurda ailəsinin və müəllimlərinin böyük payı olduğunu vurğulayıb:

"Ən böyük rol məhz onların olub".

O qeyd edib ki, 700 bala aparan 10 balı buraxılış imtahanında ana dili fənninin açıq suallarında, blok imtahanında isə riyaziyyatdan itirib.

Sonda gələcək abituriyentlərə də tövsiyəsini verib:

"Çox çalışsınlar və özlərinə inansınlar. Əsas bunlardır, qalan hər şey həll olunur".