"Bəzi araşdırmalar göstərir ki, müəyyən uşaqlarda beynin ön hissələrinin (xüsusilə prefrontal korteksin) inkişafı bir qədər ləng ola bilər. Bu, uşağın davranışına "yaşından kiçikmiş kimi davranır" təsiri verir".

Bu barədə uşaq nevroloqu, həkim Vüsalə Nuriyeva BAKU.WS-ə açıqlamasında bildirib. Onun sözlərinə görə, uşağın davranışında dəyişiklik, əsəbilik, dərsə marağın azalması və ya dostlarla ünsiyyət problemləri müşahidə olunursa, valideynlər diqqətli olmalıdır.

"Bu zaman uşaq nevroloqu psixoloq, psixiatr və məktəb məsləhətçiləri iləməkdaşlıq vacibdir. Problemin erkən mərhələdə diaqnozu daha effektiv nəticə verir.

Cəza və zorakılıq əvəzinə, sərhədlərin aydın və ardıcıl qoyulması uşağın davranışını tənzimləməyə kömək edir. Lakin uşaqlar valideynlərarası konfliktlərin qurbanı olduqda psixoloji zərbə alırlar. Burada sağlam ailə münasibətləri profilaktik rol oynayır", - deyə həkim bildirib.

Son vaxtlar uşaqlarda problem niyə artır?

Həkim deyir ki, erkən yaşda telefon və internet istifadəsi diqqət dağınıqlığı, aqressiya və sosial təcridə səbəb olur.

"Ailə münasibətlərində gərginlik: Boşanmaların artması, ailə zorakılığı və emosional dəstəyin çatışmazlığı uşaqlara birbaşa təsir edir.

Təhsil sistemi və təzyiq: Yüksək akademik gözləntilər, repetitor yüklənməsi və rəqabət uşaqlarda stressi artırır.

COVID-19 pandemiyası zamanı uşaqlar uzun müddət evdə qaldılar, sosial ünsiyyət imkanları azaldı.

Online dərslər diqqət dağınıqlığını artırdı və bir çox uşaq real sosial bacarıqlardan geri qaldı

Pandemiya sonrası təsirlər: Sosial təcrid dövrü bir çox uşaqda adaptasiya və emosional çətinliklərə gətirib çıxardı".

Ziya SƏCCAD