Abşeron Rayon Məhkəməsində dələduzluqda təqsirləndirilən Novruz Pənalıyevin (adı və soyadı şərtidir) cinayət işi üzrə məhkəmə istintaqı yekunlaşıb.

BAKU.WS Pravda.az-a istinadən xəbər verir ki, hakim Firuzə Kərimovanın sədrliyi ilə keçirilən prosesdə hökm oxunub.

Məhkəmənin hökmü ilə Novruz Pənalıyev 1 il 6 ay 24 gün müddətinə azadlığın məhdudlaşdırılması (elektron qolbaq) cəzasına məhkum edilib. Təqsirləndirilən şəxs barəsində seçilmiş həbs qətimkan tədbiri ləğv edilib və Novruz Pənalıyev dərhal məhkəmə iclas zalında həbsdən azad olunub.

İttiham aktına əsasən, Novruz Pənalıyev əvvəllər də dələduzluq cinayətinə görə məhkum olunub. Belə ki, o, Yasamal Rayon Məhkəməsinin 2024-cü il tarixli hökmü ilə Cinayət Məcəlləsinin 178.2.2 və 178.2.4-cü maddələri üzrə təqsirli bilinərək 2 il 11 ay 26 gün müddətinə azadlığın məhdudlaşdırılması cəzasına məhkum edilib. Sonradan Bakı Apellyasiya Məhkəməsinin 2025-ci il tarixli qərarı ilə ona təyin edilmiş cəza 11 ay 26 günədək azaldılıb. Lakin məhkumluğu ödənilmədən və ya qanunla müəyyən edilmiş qaydada götürülmədən yenidən cinayət əməli törədib.

Müəyyən edilib ki, təqsirləndirilən şəxs tamah niyyəti ilə, etibardan sui-istifadə və aldatma yolu ilə özgənin əmlakını ələ keçirmək məqsədilə tanışı, zərərçəkmiş S.S.-yə özünü Dövlət Tibbi-Sosial Ekspertiza və Reabilitasiya Agentliyinin həkim-eksperti kimi təqdim edib. Onun etibarını qazanaraq, arvadını əlilliyə görə əmək pensiyası ilə təmin etdirəcəyinə dair yalan vəd verib. Bu adla 2023-cü ilin aprel ayında Abşeron rayonu, Xırdalan şəhərində yerləşən parkların birində cinayətdən xəbərsiz şəxs vasitəsilə əlbəəl şəkildə 4 000 manat pul vəsaiti alıb, həmin vəsaiti şəxsi ehtiyacları üçün xərcləyərək verdiyi vədi yerinə yetirməyib. Bununla da, zərərçəkmiş şəxsə məxsus özgənin əmlakını aldatma və etibardan sui-istifadə yolu ilə ələ keçirib.

Bundan başqa, Novruz Pənalıyev təkrarən oxşar üsulla digər tanışı zərərçəkmiş D.D.-ni də aldadıb. O özünü yenə həmin agentliyin həkim-eksperti kimi təqdim edərək, zərərçəkmiş şəxsə əlilliyə görə əmək pensiyası təyin etdirəcəyinə dair yalan vədlər verib. Nəticədə D.D.-nin ümumilikdə 9 750 manat məbləğində pul vəsaitini ələ keçirərək şəxsi ehtiyacları üçün xərcləyib və verdiyi vədlərə əməl etməyib. Bununla da, zərərçəkmiş şəxsə məxsus xeyli miqdarda özgənin əmlakını aldatma və etibardan sui-istifadə yolu ilə ələ keçirməklə təkrarən dələduzluq cinayəti törədib.