Azərbaycan Xarici İşlər Nazirliyi Fransanın Avropa və Xarici İşlər Nazirliyinin iyulun 30-da yaydığı, Fransa vətəndaşı Martin Ryan barəsində keçirilən məhkəmə prosesinin və çıxarılmış hökmün qanuniliyini şübhə altına alan bəyanatını qəti şəkildə rədd edib.

AVESTA.AZ xəbər verir ki, "Caliber" məsələ ilə bağlı xüsusi araşdırma aparıb.

Xatırladaq ki, XİN Parisin məhkəmə prosesinə siyasi qiymət vermək, Azərbaycan məhkəmələrinin fəaliyyətinə müdaxilə etmək cəhdlərini, həmçinin Martin Ryanın saxlanılmasını "əsassız", məhkəmə araşdırmasını isə "ədalətsiz" kimi təqdim etməsini qəbuledilməz adlandırıb.

"XİN-in bəyanatında vurğulanırdı ki, Martin Ryan barəsində cinayət işi qanunvericiliyin tələblərinə tam uyğun şəkildə araşdırılıb. Məhkəmə təqdim olunmuş sübutlar əsasında qərar qəbul edib. Prosesin bütün mərhələlərində təqsirləndirilən şəxsin prosessual hüquqları təmin olunub. Bundan əlavə, hər bir məhkəmə iclasında Fransanın Azərbaycandakı səfirliyinin konsulluq xidmətinin nümayəndələri iştirak ediblər", - məqalədə deyilir.

Materialda bir sıra mühüm məqamlara diqqət yetirilir.

Daha əvvəl KİV-də xəbər verildiyi kimi, iş materiallarının araşdırılması zamanı Azərbaycanda Fransa diplomatik korpusunun nümayəndələri tərəfindən idarə olunan casus şəbəkəsinin fəaliyyət üsulları üzə çıxıb. Xüsusilə müəyyən edilib ki, bu şəbəkənin iştirakçıları tərcüməçilərdən, intim münasibətlərdən və digər cəlbetmə və məxfi məlumatlara çıxış əldə etmə üsullarından istifadə etməklə digər dövlətlərin diplomatik nümayəndəliklərinə gizli şəkildə nüfuz etməyə cəhd göstəriblər.

Məhkəmə prosesi zamanı çoxsaylı texniki materiallar təqdim olunub, bu fəaliyyətlə birbaşa əlaqəli şəxslərin ifadələri dinlənilib, həmçinin Martin Ryanın və iş üzrə digər fiqurantların etiraf xarakterli ifadələri səsləndirilib.

"Bununla əlaqədar Caliber.az redaksiyası Fransa casus şəbəkəsinin qanunsuz fəaliyyətini məhz hansı dövlətlərin diplomatik nümayəndəliklərinə qarşı həyata keçirdiyini müəyyən etməyi və bunu ictimaiyyətə açıqlamağı zəruri hesab edir.

Əgər Fransanın Avropa və Xarici İşlər Nazirliyi həqiqətən də bu cinayət işinin halları ilə bu qədər maraqlanırsa, redaksiyamız məhkəmə prosesinin başa çatmasını nəzərə alaraq, istintaqı aparmış təhlükəsizlik orqanına və məhkəməyə müraciət edərək müvafiq səfirliklərin adlarının açıqlanmasını xahiş etmək niyyətindədir.

Bu məlumatların açıqlanması, şübhəsiz ki, həm Fransa ictimaiyyətində, həm də Parisin açıq şəkildə öz müttəfiqləri və dostları adlandırdığı, eyni zamanda onlara qarşı gizli kəşfiyyat fəaliyyəti apardığı dövlətlərdə böyük maraq doğuracaq.

Fransanın səlahiyyətli qurumları yaxşı bilirlər ki, Fransa agentura şəbəkəsinin əməliyyatlarının hədəfi olmuş ölkələrlə bağlı məsələ bu və onunla əlaqəli cinayət işlərinin yalnız bir epizodudur və həmin işlərin digər təfərrüatı da zaman keçdikcə ictimaiyyətə məlum ola bilər.

Diqqətçəkən məqam odur ki, məhz Azərbaycanda araşdırılan cinayət işi çərçivəsində həbslərin başlanmasından, ardıcıl ifşalardan və şəxslərin "persona non grata" elan edilərək ölkədən çıxarılmasından cəmi bir neçə gün sonra Fransa Prezidenti Emmanuel Makron 2023-cü il dekabrın 20-də Fransanın Xarici Təhlükəsizlik Baş İdarəsinin (DGSE) rəhbəri Bernar Emiyeni vəzifəsindən azad edib.

Caliber.az redaksiyası, həmçinin, Fransanın Avropa və Xarici İşlər Nazirliyini Anass Derras və Aleksandr Benalla barəsində cinayət işi ilə bağlı da eyni dərəcədə açıq mövqe nümayiş etdirməyə çağırır. Söhbət Fransa rəsmilərinin xarici milyarderlərin aktivlərinin Avropa sanksiyalarından qorunmasına kömək göstərmək müqabilində rüşvət almaları iddiaları ilə bağlı aparılan araşdırmadan gedir", - məqalədə deyilir.