Amerikalı müğənni Britni Spirs keçirdiyi kosmetoloji prosedurun mənfi nəticəsi barədə danışıb.

BAKU.WS xəbər verir ki, 44 yaşlı sənətçi sosial media hesabında botoksdan sonra sol gözündə ciddi problem yarandığını bildirib.

Spirsin sözlərinə görə, həkim sol göz nahiyəsinə həddindən artıq botoks tətbiq edib. Nəticədə göz qapağı aşağı düşüb. Müğənni problemin yalnız son günlərdə tədricən aradan qalxmağa başladığını qeyd edib.

"Mənim həkimim sol gözümə o qədər çox botoks vurdu ki, gözüm aşağı düşdü. Yalnız indi yavaş-yavaş qalxmağa və əvvəlki vəziyyətinə qayıtmağa başlayıb", - deyə o bildirib.

Müğənni proseduru həyata keçirən həkimin də yaranmış nəticədən narahat olduğunu deyib. O, qadınlara kosmetoloji müdaxilələr zamanı daha diqqətli olmağı tövsiyə edib.

"Bu insanlar və həkimlər həqiqətən gözlərinizi korlaya bilərlər. Gözüm təxminən dörd həftə aşağı vəziyyətdə qaldı. Bu insanlarla bağlı diqqətli olun. Onlar üzünüzü dəyişdirməyə və hər şeyi korlamağa çalışırlar. Bədəninizə qayğı göstərin, çünki o sizindir", - Spirs vurğulayıb.

Qeyd edək ki, bu, müğənninin kosmetoloji prosedurlarla bağlı yaşadığı ilk problem deyil. O, daha əvvəl Los-Ancelesdəki həkimlərdən narazılığını ifadə edib və bəzi iynələrdən sonra üzündə şişkinlik yarandığını açıqlayıb.