Türkiyədə iyunun 1-dən etibarən baş verən meşə yanğınları ilə bağlı 43 nəfər şübhəli müəyyənləşdirilib. Onlardan 11-i həbs olunub.

BAKU.WS ANKA-ya istinadən xəbər verir ki, bunu Türkiyənin ədliyyə naziri Akın Gürlek açıqlayıb.

Nazirin sözlərinə görə, ötən həftə Adıyaman, Antalya, Aydın və Balıkəsirdə qeydə alınan 10 meşə yanğını üzrə araşdırma aparılıb. İstintaq çərçivəsində 6 nəfər barəsində cinayət işi başlanıb, onlardan 2-si həbs edilib.

Ümumilikdə, iyunun əvvəlindən 22 vilayətdə baş verən 64 meşə yanğını ilə bağlı 43 şübhəli müəyyənləşdirilib. Onlardan 11-i barəsində həbs, 18-i barəsində isə məhkəmə nəzarəti tədbiri seçilib.

Türkiyədə meşə yanğınları xüsusilə yay aylarında ölkənin cənub və cənub-qərb bölgələrində geniş yayılır. Yüksək temperatur və güclü külək alovun sürətlə yayılmasına şərait yaradır. Aralıq dənizi sahilindəki turizm bölgələrində də yanğınlarla mübarizə tədbirləri davam etdirilir.

Rəsmi statistikaya əsasən, 2025-ci ildə Türkiyədə 3 200-dən çox meşə yanğını qeydə alınıb. Yanğınlar nəticəsində 81 min hektardan artıq meşə sahəsi tam və ya qismən məhv olub. 2026-cı il üzrə yekun göstəricilər isə hələ açıqlanmayıb.