Rusiyanın bank sistemindən nağd pul çıxarılması rekord həddə çatıb.

BAKU.WS "Report"a istinadən xəbər verir ki, bu barədə "The Washington Post"un (WP) məqaləsində bildirilib.

Cari ilin əvvəlindən rusiyalılar Rusiya-Ukrayna müharibəsinin ilk ili ilə müqayisədə daha çox vəsait çıxarıblar. Bildirilib ki, tendensiya Ukrayna pilotsuz uçuş aparatlarının (PUA) hücumları və hakimiyyətin əmanətlərə çıxışı məhdudlaşdıra biləcəyi və ya müharibəni maliyyələşdirmək üçün aktivləri müsadirə etməyə başlaya biləcəyi ilə bağlı artan narahatlıqlar fonunda güclənir.

Təkcə avqustun ilk iki həftəsində Rusiya banklarından təxminən 3,4 milyard dollar (286,4 milyard rubl) çıxarılıb. Rusiya Mərkəzi Bankının məlumatlarına görə, iyul ayında axın 7,3 milyard dollar təşkil edib, iyunda isə 4,5 milyard dolları ötüb.

"Sberbank"ın maliyyə direktoru Taras Skvortsovun sözlərinə görə, bu il çıxarılan vəsaitlərin ümumi həcmi müharibənin ilk ilinin göstəricisini iki dəfə üstələyə bilər.

"Dronlar uçur. Nəsə yanır. Gərginlik artır. Və ehtimal ki, insanların həyat təcrübəsi işə düşür: pulları, ola bilsin ki, bir daha geri qaytarılmayacaq hansısa banklarda deyil, yastığın altında nağd şəkildə saxlamaq lazımdır. Bəzi banklar üçün bu, həqiqətən də problemdir. Onlar bunu gözləmirdilər və bütün nağd pullarını digər aktivlərə yatırıblar, insanlar isə bu vaxt gəlib ayda yarım trilyon rubl çıxarırlar", - deyə sabiq məmur əlavə edib.

Rusiya Mərkəzi Bankının sabiq məsləhətçisi Aleksandra Prokopenko hesab edir ki, vəsait axını əhali arasında narahatlığın dərinləşdiyini göstərir.

"Bu o deməkdir ki, insanlar Rusiya bank sisteminə və ya Rusiya maliyyə sisteminə etibar etmirlər. Bütün bunlar hökumətin bank sistemi ilə nəsə edəcəyi, əmanətləri milliləşdirə biləcəyi qorxusunun nəticəsidir", - o bildirib. Prokopenkonun fikrincə, əmanətlərin milliləşdirilməsi az ehtimal olunur. Bununla belə, o, hakimiyyətin vəsaitlərin çıxarılmasına məhdudiyyətlər tətbiq edə biləcəyini istisna etmədi.

İlin əvvəlindən Rusiya bank sistemindən çıxarılan vəsaitlərin həcmi artıq 24,7 milyard dolları (2 trilyon rubl) keçib - 2022-ci ildə məhz bu qədər vəsait çıxarılmışdı.

O zaman yalnız ilk iki həftə ərzində əmanətçilər banklardan 23 milyard dollar çıxarmışdılar. Axının qarşısını yalnız hakimiyyət tərəfindən kapitalın hərəkətinə sərt nəzarətin tətbiq edilməsindən və faiz dərəcələrinin kəskin artırılmasından sonra almaq mümkün oldu.

İndi aktivlərin mümkün müsadirəsindən narahat olan iri biznes də vəsaitləri Rusiya tənzimləyicilərinin nəzarətindən çıxarmağa çalışır. Mərkəzi Bankın məlumatlarına görə, təkcə 2026-cı ilin ikinci rübündə Rusiyadan 9,4 milyard dollardan çox vəsait köçürülüb.