Amherstdəki Massaçusets Universitetinin amerikalı alimləri, bir çox insanın uşaqlıqda peyvəndlərin bir hissəsi kimi qəbul etdiyi adi vaksinlərdən istifadə edərək xərçəng xəstəliyi ilə mübarizə üsulunu açıqlayıblar.

"Report"un məlumatına görə, bu barədə araşdırma "Frontiers in Immunology" (FI) elmi jurnalında dərc olunub.

Mütəxəssislər standart peyvəndin zülal antigenindən istifadə etməyi, onu bədxassəli şişə yerləşdirməyi və bununla da onu immun sisteminin hədəfinə çevirməyi təklif ediblər. Mütəxəssislər antigeni şişin içinə çatdırmaq vasitəsi kimi salmonellanın təhlükəsiz formasından istifadə etmək niyyətindədirlər.

Komanda nəzəriyyələrini sınaqdan keçirmək üçün ovalbumin peyvəndi ilə vaksin olunmuş siçanlarda mədəaltı vəzi şiş hüceyrələrinə ovalbumin (toyuq yumurtasının ağı) çatdırmaq üçün salmonella bakteriyasını genetik cəhətdən dəyişdirib. Məlum olub ki, zülal həm sağlam toxumaların, həm də şişlərin hüceyrələrinin sitoplazması boyunca yayılır.

Ovalbumin daha sonra xərçənglərə hücum edən sitoplazmada immun hüceyrələrdən antigenə spesifik reaksiyaya səbəb olub. Terapiya mədəaltı vəzi şişlərinin 43 %-ni aradan qaldırıb, sağ qalma müddətini artırıb və şişin reimplantasiyasının qarşısını alıb, yeddi siçandan üçü tam sağalıb.

Əhəmiyyətli məqam ondan ibarətdir ki, alimlər artıq peyvənd olunmuş gəmiricilərdə yeni şişlər yetişdirə bilməyiblər, çünki onların immun sistemi xərçəng hüceyrələrini rədd etməyə başlayıb.

Mütəxəssislər ümid edirlər ki, onların yaratdığı üsul qaraciyər xərçənginin çətin müalicə olunan formaları, həmçinin döş və mədəaltı vəzi xərçəngi ilə mübarizə aparmağa imkan verəcək.