“Keniya gender bərabərliyini təmin etmək üçün hüquqi bazasını təkmilləşdirərək böyük nailiyyətlər əldə edib”.

“Report” xəbər verir ki, bunu Keniyanın Gender Məsələləri üzrə Dövlət Departamentinin baş katibi Anns Ncoki Vanqombe noyabrın 20-də Qoşulmama Hərəkatının ailə, qadın komitələrinin Bakıda keçirilən “Qadınların hüquqlarının inkişaf etdirilməsi və səlahiyyətlərinin artırılması” mövzusunda konfransda çıxışı zamanı deyib.

"Təhsil qadınların hüquqlarını təmin edə və imkanlarını genişləndirə biləcəyi güclü bir vasitədir. Son vaxtlarda daha çox qız və qadın təhsil almağa can atır. Keniyada aztəminatlı ailələrdən olan qızların digər vətəndaşlarla bərabər təhsil almaq imkanlarına sahib olması üçün müəyyən aktlar qəbul edilib”, - o bildirib.

Onun sözlərinə görə, qadınların iqtisadi imkanlarının artırılması da gender bərabərliyinə nail olmaqda vacib rol oynayır: "Keniyada mikromaliyyə və kiçik sahibkarlığın inkişafı qadınlara öz bizneslərini yaratmaq imkanı verib. Bu da öz növbəsində onlara öz hüquqlarını təmin etməyə kömək edəcək".