İcbari Tibbi Sığorta üzrə Dövlət Agentliyi rəqəmsal xidmətləri genişləndirir.

AVESTA.AZ-in sorğusuna cavab olaraq İcbari Tibbi Sığorta üzrə Dövlət Agentliyi (İTS) bildirib ki, qurum rəqəmsal transformasiyanı əsas prioritet istiqamətlərindən biri kimi müəyyən edib və tibbi xidmətlərin elektronlaşdırılması istiqamətində ardıcıl addımlar atır.

Agentliyin məlumatına görə, qurumun rəsmi internet səhifəsində "Tibb müəssisələrinin axtarışı" bölməsi istifadəyə verilib. Bu bölmədə TƏBİB-in tabeliyindəki dövlət tibb müəssisələri, Səhiyyə Nazirliyinin elmi-tədqiqat institut və mərkəzləri, eləcə də Agentliklə müqaviləsi olan özəl tibb müəssisələrində icbari tibbi sığorta hesabına göstərilən xidmətlərin siyahısı yer alır.

Bundan əlavə, İTS, TƏBİB və İnnovasiya və Rəqəmsal İnkişaf Agentliyinin birgə əməkdaşlığı nəticəsində bir sıra xidmətlər "myGov" platformasına inteqrasiya edilib. Vətəndaşlar burada xəstəlik tarixçəsi ("epikriz"), diaqnostik müayinə nəticələri, tibbi göndərişlər, laborator analizlər, "Ailə həkimim" və "Həkim müraciətlərim" bölmələrindəki məlumatlarla tanış ola bilirlər.

Bununla yanaşı, "e-Təbib" mobil tətbiqi vasitəsilə vətəndaşlar aldıqları tibbi xidmətləri 5 ballıq şkala üzrə qiymətləndirə və rəy bildirə bilirlər. Bu sistem həm xidmət keyfiyyətinin artırılmasına, həm də şəffaf idarəetmənin təmin olunmasına imkan yaradır.