"Ölkədə gələn il həm pensiyalar, həm də pensiya kapitalının indeksləşdirilməsi nəzərdə tutulur".

Bu sözləri AVESTA.AZ-ə Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Vüqar Bayramov bildirib.

Deputat əlavə edib ki, "Əmək pensiyaları haqqında" qanuna əsasən, pensiyalar əvvəlki ildə orta aylıq əmək haqqındakı artım faizinə uyğun olaraq indeksləşdirilir:

"Bu, o deməkdir ki, növbəti ildən bütün növ pensiyalar 2025-ci ildə əmək haqlarındakı orta aylıq artım faizinə uyğun olaraq artırılacaq. Növbəti ildən etibarən yaşa, əlilliyə və ailə başçısını itirməyə görə əmək pensiyaları alan vətəndaşlarımızın pensiya məbləğində artımlar olacaq. Bu artımlar yanvar ayından etibarən tətbiq olunacaq. Bu, təxminən 1,1 milyon vətəndaşımızı əhatə edəcək.

Pensiya kapitalı isə inflyasiya səviyyəsinə uyğun olaraq indeksləşdirilib artırılır. Vətəndaşlar işlədiyi müddətdə müəyyən pensiya kapitalı yığılır və həmin pensiya kapitalına uyğun olaraq pensiya məbləği müəyyənləşir. Pensiya kapitalında indeksləşdirilmə pensiya kapitalının məbləğini artırır. Nəticədə vətəndaşlar pensiyaya çıxanda daha çox pensiya almış olur.

Mərkəzi Bankın proqnozu ondan ibarətdir ki, bu il inflyasiya səviyyəsi 6 faiz olacaq. Təbii ki, ilin sonunda konkret rəqəm müəyyənləşəcək. Əgər Mərkəzi Bankın proqnozunda ciddi kənarlaşmalar baş verməzsə, o zaman pensiya kapitalı da 6 faiz indeksləşdirilərək artırılacaq.

Məsələn, əgər vətəndaşımızın pensiya hesabında 50 min kapitalı varsa, həmin məbləğ altı faizə indeksləşdirilərək artırılacaq. Bu indeksləşdirmə hər il həyata keçirilir. Məqsəd pensiya kapitalını inflyasiyanın təsirindən qorumaqdır".

Orxan Hüseyn