Baku TV-nin qaynar xəttinə müraciət edən Ramil Məmmədov iddia edir ki, "Azəriqaz" İstehsalat Birliyi tərəfindən ona 26 min manat məbləğində cərimə yazılıb.

Vətəndaş bu məbləği ödəmədiyi üçün qurum tərəfindən məhkəməyə verildiyini bildirib.

Ramil Məmmədovun sözlərinə görə, məhkəmə prosesinin nəticəsi onun xeyrinə olsa da, adına yazılmış borc hələ də silinməyib. Şikayətçi cərimənin hansı əsaslarla hesablandığını bilmədiyini və qurumun bununla bağlı heç bir foto və ya videogörüntü təqdim etmədiyini deyib.

"Mənə 26 min manat cərimə yazıblar. Qaz idarəsinin əməkdaşı məhkəmənin birinci iclasına gəlmədi, yalnız ikinci dəfə gəlib iştirak etdi. Mənə maraqlıdır, bu məbləği hansı hesablamalarla çıxarıblar? Bir foto və ya video göstərsinlər ki, mən 26 min manatlıq qazı necə istifadə etmişəm. Əgər qanunsuz istifadə etməkdə təqsirliyəmsə, bunu faktla sübut etsinlər. Mən indiyə qədər heç yerdə belə bir məbləğ görməmişəm", - deyə şikayətçi bildirib.

Ramil Məmmədov, həmçinin qaz təchizatı ilə bağlı mütəmadi problemlər yaşadığını da qeyd edib. Onun sözlərinə görə, qaz sayğacı dəfələrlə plomblanıb, bəzi hallarda isə sayğac dəyişdirilməzdən əvvəl ona heç bir məlumat verilməyib. Nəticədə, ailə məişət ehtiyaclarını ödəmək üçün qaz balonundan və odun sobasından istifadə etməyə məcbur qalıb.