Noyabrın 17-də ABŞ-də televiziya və radio yayımı fövqəladə xəbərdarlıq sisteminin sınağı ilə əlaqədar qısa müddətə dayandırılacaq. Eyni zamanda, Böyük Britaniya və bir sıra Avropa ölkələrində əhaliyə mümkün böhran vəziyyətlərinə hazır olmaq, ərzaq, su və nağd pul ehtiyatı saxlamaq tövsiyə edilib.

AVESTA.AZ xəbər verir ki, ABŞ Federal Fövqəladə Halların İdarə Olunması Agentliyi və Federal Rabitə Komissiyası ölkə üzrə Fövqəladə Xəbərdarlıq Sisteminin növbəti sınağının 17 noyabr 2026-cı ildə keçiriləcəyini açıqlayıb.

Sınaq zamanı televiziya, radio, kabel yayımı və peyk sistemləri vasitəsilə xəbərdarlıq mesajları yayımlanacaq. Bu müddətdə adi yayımların təxminən bir dəqiqəlik kəsilməsi gözlənilir. Mesajlar ingilis və ispan dillərində təqdim olunacaq.

Rəsmilər bildiriblər ki, əlverişsiz hava şəraiti və ya real fövqəladə vəziyyət yaranarsa, sınaq dekabrın 3-dək təxirə salına bilər.

FEMA-nın məlumatına görə, noyabrın 17-də keçiriləcək yoxlama yalnız televiziya və radio yayım sistemlərini əhatə edəcək. Buna görə də mobil telefonlara fövqəladə xəbərdarlıq bildirişləri göndərilməyəcək. Sınaq zamanı yayımlanacaq mesajda bunun ölkə miqyaslı texniki yoxlama olduğu və vətəndaşların hər hansı tədbir görməsinə ehtiyac olmadığı bildiriləcək.

ABŞ-də sınağa hazırlıq getdiyi bir vaxtda Böyük Britaniya hökuməti də oktyabrın 22-də fövqəladə vəziyyətlərə hazırlıqla bağlı yeni kampaniyaya başlayıb.

"Be Ready" adlanan kampaniya çərçivəsində vətəndaşlara mümkün böhran zamanı ən azı 72 saat ərzində əsas ehtiyaclarını müstəqil şəkildə qarşılamaq üçün hazırlıq görmək tövsiyə olunub.

Hökumət evlərdə hər bir şəxs üçün üç günlük içməli su və xarab olmayan ərzaq ehtiyatı saxlamağı məsləhət görür. Bundan başqa, müəyyən miqdarda nağd pul, fənər, ehtiyat batareyalar və ilkin tibbi yardım vasitələrinin də hazır olması tövsiyə edilir.

Kampaniyada elektrik enerjisi, su, internet və telefon xidmətlərinin uzun müddətə kəsilməsi ehtimalına xüsusi diqqət yetirilir.

Almaniyada isə mülki müdafiə çərçivəsində ailələrin təxminən 10 gün üçün kifayət edəcək ərzaq və su ehtiyatı toplaması məsləhət görülüb.

Avropa ölkələrinin hazırlıq planlarında təbii fəlakətlər, enerji təchizatında fasilələr, kiberhücumlar və kritik infrastrukturun zədələnməsi kimi müxtəlif risklər nəzərə alınır.