Mənə elə gəlir, finalda “Araz-Naxçıvan” qələbə qazanacaq.

Bunu “Report”a açıqlamasında Azərbaycan Futzal Federasiyasında (AFF) seleksiyaçı-məşqçi kimi fəaliyyət göstərən Ağatahir Əzimov ölkə kubokunun finalında baş tutacaq “Araz-Naxçıvan” - “Baku Fire” matçını dəyərləndirərkən deyib.

Mütəxəssis hər iki komandanın eyni səviyyədə olduğunu desə də, cüzi də olsa, “Araz-Naxçıvan”ı üstün sayıb: “Mövsümün sonudur, komandalar yorğundur. “Baku Fire”nin kuboku qazanmaq istəyi çoxdur. Çünki ölkə çempionu “Araz-Naxçıvan” olub. Çətin oyun olmalıdır”.

A.Əzimov “Araz-Naxçıvan”ın əvvəlki kimi güclü olmadığını bildirib: “Komandada 2-3 legioner qalıb, qalanları cavan uşaqlardır. “Baku Fire”nin heyətində isə təcrübəli azərbaycanlı futzalçılar var. Səhv etmirəmsə, bir braziliyalı legioner oynadırlar. Çempionatdakı qarşılaşmalarına baxdım. Demək olar, eyni səviyyədədirlər. “Araz-Naxçıvan”da legionerlər elə də güclü deyillər. Əvvəllər kiminləsə qarşılaşanda deyirdik ki, “Araz-Naxçıvan” 99 faiz qələbə qazanacaq. İndi isə belə deyil. “Baku Fire” də qələbə qazana bilər. “Araz-Naxçıvan”ın sabiq baş məşqçisi Joze Alesio Da Silva azərbaycanlılara şans vermirdi, 8 braziliyalı ilə oynayırdı. Ancaq Vitali Borisov 3-4 braziliyalıya şans verir. Bu gün yığmada oynatmağa azərbaycanlı uşaq tapmaq olmur deyə, Borisov yerlilərə üstünlük vermək məcburiyyətindədir”.

Qeyd edək ki, futzal üzrə Azərbaycan Kubokunun final qarşılaşması bu gün, saat 14:00-da Bakı İdman Sarayında keçiriləcək.