Naxçıvan Şəhər İcra Hakimiyyəti kommunal təyinatlı texnikaların satın alınması üçün müsabiqə elan edib.

BAKU.WS-in məlumatına görə, müsabiqənin ümumi dəyəri 1.576.810 AZN təşkil edir və müxtəlif texnikaların alınmasını nəzərdə tutur.

Müsabiqə 6 mart 2025-ci ildə elan olunub və təkliflərin təqdim edilmə müddəti 22 aprel 2025-ci il, saat 10:00-dək davam edəcək. Eyni gün müsabiqə çərçivəsində təqdim edilən zərflərin açılışı nəzərdə tutulur.

Alınacaq texnikalar bunlardır:

Su maşını (10 tonluq) – Su çəninin həcmi 9.000 - 12.000 litr, mühərrik gücü 275 - 320 a.g, mexaniki sürətlər qutusu, EURO-5 standartına uyğun.

Yol süpürgə maşını – 7-8 m³ həcmli, çirkli və təmiz su çənləri ilə təchiz olunmuş, paslanmaz poladdan hazırlanmışdır.

Avtosəbət (18 metr) – 18 metr yüksəkliyə qədər işləyə bilən, mexaniki sürətlər qutulu avadanlıq.

Kran-manipulyator – 5-6 metr uzunluğunda kran qolu ilə 4-5 ton yük qaldırma qabiliyyətinə malikdir.

Qəza-bərpa xidməti avtomobili – İçərisində generator, qaynaq aparatı, hava kompressoru və digər alətlər olan xüsusi təmir maşınıdır.

Özüboşaldan yük maşını (10 ton) – 9-12 m³ həcmli kuzov, 9.000-12.000 kq yük götürmə qabiliyyəti, mexaniki sürətlər qutusu.

Bütün texnikalar 2024-2025-ci il istehsalı və tam yeni olmalıdır. Müsabiqədə iştirak etmək istəyən şirkətlər müvafiq sənədləri təqdim etməlidirlər.

Bu satınalma, Naxçıvan şəhərində kommunal xidmətlərin keyfiyyətini artırmaq və infrastrukturun inkişafını təmin etmək məqsədi daşıyır.

Orxan Hüseyn