Ağız sağlamlığı yalnız diş və diş ətlərindən ibarət deyil. Mütəxəssislərin fikrincə, ağızda yaranan infeksiyalar, iltihablar və bakteriyalar bədənimizin digər orqanlarına da ciddi təsir göstərə bilər.

AVESTA.AZ xəbər verir ki, araşdırmalara görə, ağız boşluğunda toplanan zərərli bakteriyalar qan dövranına keçərək ürək, böyrək, qaraciyər və hətta beyinə qədər yayıla bilər.

Xüsusilə diş əti xəstəlikləri ürək-damar problemləri ilə əlaqələndirilir. Periodontit (diş əti iltihabı) olan insanlarda infarkt və insult riski daha yüksək olur.

Bundan başqa, ağız sağlamlığının pozulması tənəffüs yollarında infeksiya riskini də artırır. Dişlərdəki infeksiyalar udqunma və tənəffüs yolu ilə ağciyərlərə keçərək pnevmoniya kimi ağır fəsadlara səbəb ola bilər. Eyni zamanda, şəkərli diabet xəstələrində ağızda yaranan iltihablar qanda şəkərin tənzimlənməsini çətinləşdirir.

Həkimlər hər altı aydan bir stomatoloqa müraciət etməyi, gündəlik diş və ağız baxımına ciddi yanaşmağı tövsiyə edirlər. Çünki ağız sağlamlığının qorunması ümumi sağlamlığın əsas şərtlərindən biridir.