Yay mövsümünün gəlişi ilə dünyanın müxtəlif ölkələrində yerləşən məşhur çimərliklər yenidən turistlərlə dolub-daşır.

BAKU.WS xəbər verir ki, bəzi sahillər var ki, burada adam əlindən tərpənmək belə mümkün olmur. Hər il milyonlarla insan bu çimərliklərə axışır, istirahət etmək, günəş vannası qəbul etmək və dənizin dadını çıxarmaq üçün növbəyə dayanır.

1. Kopa-Kabana (Braziliya)

Rio-de-Janeyroda yerləşən bu çimərlik təkcə Braziliyanın deyil, dünyanın ən məşhur sahillərindən biridir. Yay aylarında burada gündəlik on minlərlə insan toplaşır. Qızmar günəş, musiqi, rəngarəng atmosfer və bitməyən şənliklər bu məkanı turistlərin sevimlisinə çevirir.

2. Bondi Beach (Avstraliya)

Sidneydə yerləşən bu çimərlik hər zaman sörfçülərlə və günəşə çıxmaq istəyənlərlə dolu olur. Yayın qızmar günlərində çimərlikdə boş yer tapmaq demək olar ki, mümkünsüzdür. Dəniz suyu və dalğaları ilə məşhurdur.

3. Waikiki Beach (Honolulu, Havay)

Turistlərin ən çox üz tutduğu sahillərdən biri olan Waikiki, ildə milyonlarla qonaq qəbul edir. Otellərlə əhatələnmiş bu çimərlik həm gündüz, həm də gecə saatlarında sıxlıqla seçilir.

4. Maya Bay (Tailand)

Leonardo DiKaprionun rol aldığı "The Beach" filmindən sonra bu məkan dünyada populyarlıq qazandı. Elə buna görə də illərdir turistlərin axınına məruz qalan Maya Bay bəzən ekoloji ziyan səbəbindən bağlansa da, yenidən açıldıqdan sonra sıxlıq dəyişməyib.

5. Barceloneta (İspaniya)

Barselonanı ziyarət edən turistlərin ilk dayanacaqlarından biri olan bu çimərlik gündəlik minlərlə insanı cəlb edir. Səhərdən axşama qədər burada çimənlər, voleybol oynayanlar və günəşlənənlər sıxlıq yaradır.

Bu kimi çimərliklərdə bəzən dənizə girməkdən çox yer tapmaq daha böyük problemə çevrilir. Mütəxəssislər belə sahillərə erkən saatlarda getməyi və şəxsi əşyaların təhlükəsizliyinə diqqət yetirməyi tövsiyə edirlər.