Yeni ildə insanlar həm uzun iş ilinin yorğunluğunu atmaq, həm də ailəsi ilə birlikdə maraqlı və yadda qalan istirahət keçirmək üçün ölkə daxilində müxtəlif istiqamətlərə üz tuturlar.

AVESTA.AZ-in məlumtına görə, xüsusilə qış mövsümünün yaratdığı ab-hava, bayram şənliyi və regionlarda təşkil olunan mövsümi əyləncələr otel və turizm sektoruna marağı daha da artırır.

Dağ mənzərələri, qarlı təbiət, termal bulaqlar, kənd turizmi və şəhərdən uzaqda sakitlik axtaranlar üçün geniş seçim imkanları yaranır.

Hazırda Azərbaycanın bir çox rayonunda otellər Yeni il mövsümünə xüsusi paketlər, endirimlər və fərqli xidmətlərlə hazırlaşır. Ailələr üçün əyləncə proqramları, SPA xidmətləri, milli mətbəx nümunələri və uşaq fəaliyyətləri bayram günlərini daha cazibədar edir. Bu səbəbdən bayram vaxtı bölgələrə maraq artır, xüsusilə də həm əlçatan qiymətə istirahət, həm də komfortlu şərait axtaran turistlər müxtəlif rayonları müqayisə edərək öz büdcəsinə uyğun variant seçməyə çalışırlar.

Maraqlıdır ki, Azərbaycanda Yeni ildə istirahət üçün ən ucuz otellər hansı rayonlarda yerləşir?

Turizm eksperti Ceyhun Aşurov AVESTA.AZ-ə bildirib ki, Yeni ildə ən əlverişli təklif Qarabağ zonasındadır: "Hazırda Qarabağ və Lənkəran zonası qiymətlər baxımından daha münasib paketlər təklif edir. Belə ki, adını çəkdimiz bölgələrdə iki gecə (3 gün) adambaşı 500-600 manat ətrafında dincəlmək mümkündür. Bura gündlik yemək və Yeni il şənlikləri də daxildir.

Bu regionlarla nisbətdə daha baha Qəbələ, Quba və Qusarda otelləri qeyd etmək olar. Bu istiqamətlərdə qiymətlər tələbatın yüksək olduğuna görə daha yüksəkdir".

Orxan Hüseyn