Bakıda 1956-cı il təvəllüdlü qadının evinə basqın edərək onu öldürməyə cəhddə ittiham olunan şəxsin işi üzrə istintaq yekunlaşıb, ona hökm oxunub.

BAKU.WS Oxu.az-a istinadən xəbər verir ki, hadisə 2025-ci il mayın 29-da baş verib.

Belə ki, Cümşüd Abbasov (ad və soyad şərtidir) zərərçəkmişin mənzilinin qapısını döyüb qonşusu olduğunu, binaya elektrik və suyun verilişində ümumi problemlə əlaqədar mənzilə baxış keçirmək istədiyini bildirib. O, bu yolla zərərçəkmişi aldadıb, mənzilin qapısını açmasına nail olduqdan sonra üzərindəki bıçaqla hədə-qorxu gələrək, ona basqın edib. Abbasov zərərçəkmişin bədəninin müxtəlif nahiyələrinə, o cümlədən qarın və döş boşluqlarına bir neçə dəfə zərbələr endirib. Daha sonra baş örtüyü ilə mərhumun qollarını və ayaqlarını çarpayıya bağlayıb.

C.Abbasov bundan sonra zərərçəkmişin qulaqlarında olan 720 manat dəyərində bir cüt qızıl sırğanı, masanın üzərində olan bir ədəd beş manatlıq əskinası, 180 manat dəyərində "Samsung Galaxy A10" markalı mobil telefon cihazını, ümumilikdə 905 manat dəyərində əmlakı quldurluq etməklə talayıb.

O, mərhumun aman diləməsinə və yalvarışlarına baxmayaraq bədəninin müxtəlif nahiyələrinə zərbələr endirməyə davam edib. C.Abbasov xəsarətlərin nəticəsində ahıl qadının öldüyünü düşünərək mənzili tərk edib.

Lakin qadın müvazinətini toplamaqla əl-qolunu açaraq mənzildən çıxıb və binanın qarşısına enib. Daha sonra ətrafda toplaşmış şəxslər təcili tibbi yardım çağırıblar. Qadın xəstəxanaya çatdırılıb, ilkin tibbi yardım göstərilib.

Bakı Ağı Cinayətlər Məhkəməsinin qərarı ilə C.Abbasova 17 il müddətinə azadlıqdan məhrum etmə cəzası təyin edilib.