BMT-nin hesabatlarında dünyada sağlam qidalanmanın bir çox insan üçün baha başa gəldiyi qeyd olunur.

Bəs sağlam qidalanma həqiqətən bahadırmı? Sağlam və balanslı qidalanmaq üçün mütləq bahalı məhsullar seçmək lazımdır? Xüsusilə yay aylarında sağlam qidalanma necə təşkil edilməli, hansı qidalara üstünlük verilməlidir?

AVESTA.AZ xəbər verir ki, Qida mühəndisi, sağlam qidalanma üzrə mütəxəssis Fərid Səfərov mövzu ilə bağlı Trend-ə bildirib ki, BMT-nin hesabatlarında qeyd olunduğu kimi, bir çox ölkədə sağlam qidalanmanın dəyəri insanların gəlirləri ilə müqayisədə yüksək ola bilər. Lakin bu, sağlam qidalanmanın mütləq bahalı məhsullar almaq demək olduğu mənasına gəlmir. Onun sözlərinə görə, əsas məsələ düzgün seçim etmək və qida rasionunu balanslı qurmaqdır:

"Sağlam qidalanma üçün mütləq bahalı və ya xaricdən gətirilən məhsullara ehtiyac yoxdur. Mövsümi meyvə və tərəvəzlər, paxlalılar, yumurta, qatıq, yulaf, qarabaşaq, düyü və digər yerli məhsullar həm qidalı, həm də nisbətən əlçatan seçimlərdir. Əvəzində hazır yeməklər, fast-food, qazlı və şəkərli içkilər, müxtəlif qəlyanaltılar uzunmüddətli perspektivdə həm daha çox xərc yarada, həm də sağlamlığa mənfi təsir göstərə bilər".

Fərid Səfərov qeyd edib ki, sağlam qidalanmanın əlçatan olması üçün qidaların əvvəlcədən planlaşdırılması, israfın qarşısının alınması və mövsümə uyğun məhsulların seçilməsi də mühüm rol oynayır:

"Yəni sağlam qidalanma bəzi ölkələrdə iqtisadi baxımdan çətin olsa da, düzgün planlaşdırma və ağıllı seçimlərlə onu daha əlçatan etmək mümkündür. Ən vacib məqam bahalı məhsullar deyil, qida rasionunun balanslı, müxtəlif və təhlükəsiz olmasıdır".

Yay aylarında sağlam qidalanma üçün bunlara üstünlük verilməlidir:

Yay aylarında sağlam qidalanmanın əsas prinsipi orqanizmin su, vitamin və mineral balansını qorumaq, eyni zamanda qida zəhərlənmələrinin qarşısını almaqdır. İsti havalarda daha çox mövsümi meyvə və tərəvəzlərə, tam taxıllara, az yağlı süd məhsullarına və yağsız ət, balıq kimi zülal mənbələrinə üstünlük verilməlidir. Ağır, yağlı və çox şəkərli qidaların qəbulu isə mümkün qədər məhdudlaşdırılmalıdır".

Mütəxəssisin fikrincə, sağlam qidalanma prinsipində gün ərzində kifayət qədər su içmək çox vacibdir. O qeyd edib ki, susuzluq hissini gözləmədən müntəzəm maye qəbul etmək, xüsusilə açıq havada çalışan və ya fiziki aktivliyi çox olan insanlar üçün böyük əhəmiyyət daşıyır:

"Şirin qazlı içkilər əvəzinə su, ayran və şəkərsiz bitki çayları daha sağlam seçimdir.

Yayda qidaların tez xarab olması səbəbindən onların saxlanma şəraitinə xüsusi diqqət yetirilməlidir. Ət, süd məhsulları, balıq və mayonezli yeməklər uzun müddət otaq temperaturunda saxlanmamalı, soyuq zəncir qorunmalıdır. Meyvə və tərəvəzlər isə istifadə edilməzdən əvvəl yaxşı yuyulmalıdır.

Bundan əlavə, qidalanma rejimi də önəmlidir. Günün ən isti saatlarında ağır yeməklərdən çəkinmək, daha yüngül və tez həzm olunan qidalara üstünlük vermək həm həzm sisteminin rahat işləməsinə, həm də ümumi sağlamlığın qorunmasına kömək edir. Belə yanaşma yay mövsümünü daha sağlam və təhlükəsiz keçirməyə imkan verir".