1972-ci ildən dünya vaxtı ilə Yer kürəsinin fırlanması arasındakı fərqi tənzimləmək üçün istifadə olunan artıq saniyə tətbiqinin ləğvi təklif edilir. Bu addımın əsas səbəbi texnologiya və naviqasiya sistemlərində yaranan problemlərin qarşısını almaqdır.

AVESTA.AZ xəbər verir ki, Beynəlxalq Çəkilər və Ölçülər Bürosunun üzvü olan 69 ölkə məsələ ilə bağlı səsverməyə hazırlaşır. Təklif qəbul edilərsə, qərarın 2027-ci ilin mayında qüvvəyə minməsi nəzərdə tutulur.

Artıq saniyə atom saatları ilə müəyyən edilən dünya vaxtını Yerin qeyri-sabit fırlanma sürətinə uyğunlaşdırmaq üçün tətbiq olunur. Lakin əlavə edilən saniyələr əvvəllər sosial şəbəkələrdə, təyyarə rezervasiya sistemlərində və bulud xidmətlərində fasilələrə səbəb olub.

2022-ci ildə qəbul edilən qərara əsasən, tətbiqin 2035-ci ilədək mərhələli şəkildə ləğvi planlaşdırılmışdı. Yeni təklif qəbul olunarsa, rəsmi vaxtın Yerin fırlanmasından tədricən uzaqlaşmasına icazə veriləcək. Hesablamalara görə, iki zaman sistemi arasındakı fərqin bir saata çatması 3 000 ildən çox çəkə bilər.