19.10.2026-cı il tarixində "Instagram" sosial şəbəkəsində 103 xidmətinə edilən zənglərin aidiyyəti rayon əvəzinə qonşu rayonun dispetçer xidmətinə yönləndirilməsi ilə bağlı paylaşım Respublika Təcili və Təxirəsalınmaz Tibbi Yardım Mərkəzi tərəfindən araşdırılıb.

Bu barədə AVESTA.AZ-in sorğusuna cavab olaraq TƏBİB-in mətbuat xidmətindən məlumat verilib.

"Qeyd olunan və analoji halların qarşısının alınması, eləcə də vətəndaş müraciətlərinin operativ qəbulunun təmin edilməsi məqsədilə regionlar üzrə müvafiq bölmələrin dispetçerlərinə tapşırıqlar verilib. Tapşırığa əsasən zəng aidiyyəti olmayan rayonun 103 xidmətinə daxil olsa belə, dispetçer müraciəti qəbul etməli, zəruri məlumatları qeydə almalı və çağırışın müvafiq bölmə üzrə yönləndirilməsini təmin etməlidir.

Hər bir vətəndaş üçün əlçatan olmaq və müraciətlərə operativ reaksiya vermək bizim əsas vəzifələrimizdəndir".

***11:08

Qazax rayonunun Təzə Məhlə adlanan ərazisində - Alı Mustafayev, Osman Sarıvəlli və Xətai küçələrində yaşayan sakinlərə təcili tibbi yardım xidmətinin göstərilmədiyi iddia edilir.

AVESTA.AZ xəbər verir ki, bu barədə rayon sakini, bloger Cavanşir Rafiqoğlu paylaşım edib.

O, bildirib ki, sözügedən ərazidə yaşayan sakinlər təcili yardım çağırarkən Ağstafa rayonu üzrə müvafiq şöbəyə yönləndirilirlər.

"Ağstafadakı aidiyyəti qurum isə məsələyə baxmadığını bildirir. Sonra bizə başqa bir nömrə verir və həmin nömrəyə zəng ödənişlidir. Əgər telefonunda balans yoxdursa qalıb orada öləcəksən".

Bloger vurğulayıb ki, atasının beyninə qan sızıb, vəziyyəti pisdir və ona ilkin tibbi yardım göstərilməyib.

Məsələ ilə bağlı TƏBİB-ə sorğu ünvanlamışıq. Məsələ ilə əlaqədar məlumat veriləcəyi qeyd edilib.

View this post on Instagram

A post shared by Cavanşir Rafiqoğlu (@cavansir_rafiqoglu)

Banu Hüseynli