Peşəkar mühasib sertifikatı (PMS) imtahanının birinci mərhələsində iştirak etmək istəyən namizədlərin qeydiyyatı başlanıb.

Dövlət İmtahan Mərkəzindən (DİM) AVESTA.AZ-ə bildirilib ki, imtahan noyabrın 22-də Bakı və Naxçıvan şəhərlərində kompüter vasitəsilə elektron formada təşkil olunacaq. İmtahan saat 16:00-da başlayacaq. Bakı şəhərində 760, Naxçıvan şəhərində isə 160 yer ayrılıb. Ümumilikdə 920 namizədin imtahanda iştirakı nəzərdə tutulur.

Namizədlər oktyabrın 22-si saat 16:00-dan noyabrın 12-si saat 18:00-dək DİM-in elektron xidmətlər sistemi vasitəsilə qeydiyyatdan keçə bilərlər. İmtahanda iştirak etmək istəyənlər sertifikat növünə uyğun istiqamətlərdən birini seçməlidirlər. Maliyyə Hesabatlarının Beynəlxalq Standartları üzrə PMS imtahanı saat 10:00-da, Kiçik və Orta Sahibkarlıq Subyektləri üçün Maliyyə Hesabatlarının Beynəlxalq Standartları, eləcə də İctimai Sektor üçün Mühasibat Uçotunun Beynəlxalq Standartları üzrə I və II səviyyə PMS imtahanları isə saat 16:00-da başlayacaq.

İmtahanda iştirak haqqı Maliyyə Hesabatlarının Beynəlxalq Standartları və Kiçik və Orta Sahibkarlıq Subyektləri üçün Maliyyə Hesabatlarının Beynəlxalq Standartları üzrə sertifikatlar üçün 100 manat, İctimai Sektor üçün Mühasibat Uçotunun Beynəlxalq Standartları üzrə I və II səviyyə sertifikatları üçün isə 50 manatdır.

Müəyyən beynəlxalq peşəkar sertifikatlara malik namizədlər müvafiq qaydalara uyğun olaraq imtahanın birinci mərhələsindən azad edilə bilərlər. Maliyyə Hesabatlarının Beynəlxalq Standartları və Kiçik və Orta Sahibkarlıq Subyektləri üçün Maliyyə Hesabatlarının Beynəlxalq Standartları üzrə sertifikat almaq istəyən namizədlər üçün belə imkan ACCA-nın "Financial Reporting" imtahanını uğurla keçdiyini təsdiq edən sənəd və ya "DipIFR" sertifikatı, CIMA-nın F2 "Advanced Financial Reporting" sertifikatı, CPA sertifikatı, ACA/ICAEW sertifikatı və ya ICFM-in "Diploma in IFRS" sənədi olduqda nəzərdə tutulur. İctimai Sektor üçün Mühasibat Uçotunun Beynəlxalq Standartları üzrə I və ya II səviyyə sertifikat almaq istəyən namizədlər isə CIPFA sertifikatına malik olduqları halda birinci mərhələdən azad edilə bilərlər.

İmtahanda iştirak üçün namizədlər iqtisadi sahədə orta ixtisas təhsili haqqında diplom və mühasibatlıq sahəsində azı beşillik iş stajını təsdiq edən sənədlərin surətlərini və ya ali təhsil haqqında diplomun surətini təqdim etməlidirlər. PMS imtahanında iştirak hüququ verən orta ixtisas ixtisaslarının siyahısı DİM-in rəsmi internet səhifəsində yerləşdirilib.

Orta ixtisas təhsili üzrə müvafiq ixtisasları bitirən namizədlər mühasibatlıq sahəsində azı beşillik iş stajını təsdiq edən əmək kitabçasının surətini qeydiyyat zamanı elektron şəkildə təqdim etməlidirlər. Əmək kitabçasındakı məlumatların həqiqiliyi DİM tərəfindən yoxlanılacaq və namizədə bununla bağlı bildiriş göndəriləcək.