Aztəminatlı ailələrə dövlət tərəfindən ünvanlı sosial yardım göstərilir. Bu yardımın əsas məqsədi gəlirləri müəyyən edilmiş ehtiyac meyarından aşağı olan ailələrin sosial təminatını yaxşılaşdırmaq və onların maddi vəziyyətini dəstəkləməkdir. Lakin hər azgəlirli ailə avtomatik olaraq bu yardımı almaq hüququ qazanmır. Bunun üçün qanunvericilikdə nəzərdə tutulan şərtlər də mövcuddur.

BAKU.WS-in məlumatına görə, ailə üzvlərinin orta aylıq gəliri hər bir nəfər üçün müəyyən edilmiş ehtiyac meyarının məcmusundan aşağı olduqda həmin ailə aztəminatlı hesab edilir. Bu məqsədlə ailə dedikdə qohumluq və ya qanunvericiliklə müəyyən edilmiş digər bağlılığı olan, birgə yaşayan və ümumi ev təsərrüfatına malik şəxslər, eləcə də tənha yaşayan şəxslər nəzərdə tutulur.

Kimlər ünvanlı sosial yardım ala bilər?

Ünvanlı sosial yardım almaq üçün ailənin gəlirinin aşağı olması ilə yanaşı, bu vəziyyətin ailədən asılı olmayan səbəblərdən yaranması da tələb olunur. Belə səbəblərə aşağıdakılar daxildir:

• Ailə üzvlərinin əmək qabiliyyətsiz olması;

• Ailənin əmək qabiliyyətli üzvünün orqanizmin funksiyalarının 81–100 faiz pozulmasına görə əlilliyi müəyyən edilmiş şəxsə, 18 yaşınadək əlilliyi olan şəxsə və ya 8 yaşına çatmamış uşağa qulluq etməsi;

• Ailə üzvünün 23 yaşınadək əyani təhsil alması;

• Dövlət orqanının və ya hüquqi şəxsin ləğvi, yaxud işçilərin sayının və ya ştatların ixtisarı ilə əlaqədar işsiz kimi qeydə alınması;

• Ailə üzvünün vəfat etməsi, məhkəmə tərəfindən itkin düşmüş və ya ölmüş hesab edilməsi, azadlıqdan məhrum olunması, yaxud olduğu yerin məlum olmaması.

Sosial yardımın məbləği necə hesablanır?

Yardımın məbləği ailənin orta aylıq gəliri ilə ailə üzvləri üçün müəyyən edilmiş ehtiyac meyarının məcmusu arasındakı fərq əsasında hesablanır.

Ailənin orta aylıq gəliri son 12 ay ərzində əldə etdiyi ümumi gəlirin 12-yə bölünməsi ilə müəyyən edilir. Beləliklə, yardımın məbləği ailənin gəlirindən və ehtiyac meyarı üzrə hesablanan məbləğdən asılı olur.

Sosial yardım müraciət edilən ayın 1-dən etibarən bir il müddətinə təyin olunur. Ödəniş hər ay bir dəfə aztəminatlı ailənin təmsilçisinin adına açılmış kart hesabına tam məbləğdə və nağdsız qaydada köçürülür.

Hansı hallarda sosial yardım təyin olunmur?

Qanunvericilikdə ünvanlı sosial yardımın verilməsindən imtina üçün bir sıra hallar müəyyən edilib. Bunlara aşağıdakılar daxildir:

1. Ərizə-bəyannamədə göstərilən məlumatların yoxlanılması zamanı uyğunsuzluq aşkarlanarsa;

2. Müraciətdən əvvəlki ardıcıl 12 ay ərzində ailənin orta aylıq gəliri adambaşına düşən ehtiyac meyarının məcmusuna bərabər və ya ondan yüksək olarsa;

3. Həmin 12 ay ərzində ailə ölkə üzrə təsdiq edilmiş yaşayış minimumunun 12 mislindən çox məbləğdə alqı-satqı əməliyyatı apararsa;

4. Ailənin mülkiyyətində və ya istifadəsində nəqliyyat vasitəsi olarsa. Dövlət tərəfindən reabilitasiya məqsədilə verilmiş nəqliyyat vasitələri bu qaydadan istisnadır;

5. Ailənin əmək qabiliyyətli, işləməyən üzvü Dövlət Məşğulluq Agentliyinin müvafiq struktur bölməsi tərəfindən təklif edilən iki münasib işdən imtina edərsə. Bu halda sosial yardım hüququna təkrar müraciətdən bir ay sonra baxılır;

6. Ailənin adambaşına düşən kommunal və rabitə xərclərinin orta aylıq məbləği ölkə üzrə təsdiq edilmiş yaşayış minimumunun 15 faizinə bərabər və ya ondan çox olarsa;

7. Ailənin mülkiyyətində müxtəlif ünvanlarda yerləşən eyni təyinatlı iki və ya daha çox daşınmaz əmlak olarsa.