2027-ci ildə hərbi qulluqçuların mənzil təminatı və kirayə kompensasiyaları üçün nəzərdə tutulan ümumi vəsait 20.8 milyon manat azalacaq

Azərbaycanda 2027-ci ildə hərbi qulluqçuların mənzil təminatı və bununla bağlı digər zəruri xərclərin maliyyələşdirilməsi üçün 15 milyon manat ayrılması nəzərdə tutulur. Bu, 2026-cı ilin dövlət büdcəsində həmin məqsədlə nəzərdə tutulmuş 35 milyon manatla müqayisədə 20 milyon manat və ya 57.1 faiz azdır.

BAKU.WS Oxu.az-a istinadən xəbər verir ki, sözügedən məsələ Milli Məclisin İqtisadi siyasət, sənaye və sahibkarlıq komitəsinin bugünkü iclasında müzakirəyə çıxarılan "Azərbaycan Respublikasının 2027-ci il dövlət büdcəsi haqqında" Qanun layihəsinin materiallarında əksini tapıb.

Sənədə əsasən, vəsait 20 il və daha çox xidmət etmiş, hazırda xidmətdə olan və ehtiyata buraxılmış hərbi qulluqçuların mənzillə təmin olunmasına və digər zəruri xərclərə yönəldiləcək.

Müqayisə üçün, 2026-cı ilin dövlət büdcəsində bu istiqamət üzrə 35 milyon manat ayrılması nəzərdə tutulub. Beləliklə, növbəti il üçün proqnozlaşdırılan məbləğ cari ilin göstəricisindən 2.3 dəfədən çox azdır.

Hərbi qulluqçulara kirayə yaşayış sahəsinə görə ödənilən pul kompensasiyası üzrə də azalma proqnozlaşdırılır.

Belə ki, 2027-ci ildə yaşayış yeri olmayan hərbi qulluqçulara, o cümlədən ehtiyatda və istefada olan şəxslərə kirayə mənzilə görə pul kompensasiyasının ödənilməsi üçün 14.7 milyon manat nəzərdə tutulur.

2026-cı ildə bu məqsədlə 15.5 milyon manat vəsait ayrılması planlaşdırılıb. Beləliklə, kirayə kompensasiyalarına yönəldilən vəsait 800 min manat və ya təxminən 5.2 faiz azalacaq.

Ümumilikdə, hərbi qulluqçuların mənzil təminatı və digər zəruri xərclər, eləcə də kirayə kompensasiyaları üzrə 2026-cı ildə 50.5 milyon manat nəzərdə tutulduğu halda, 2027-ci ildə bu məbləğin 29.7 milyon manat olması proqnozlaşdırılır.

Bu isə iki istiqamət üzrə ümumi maliyyələşmənin 20.8 milyon manat və ya 41.2 faiz azalması deməkdir.

Qeyd edək ki, hərbi qulluqçuların mənzil təminatı ilə bağlı tədbirlər Azərbaycan Respublikası Prezidentinin 28 dekabr 2011-ci il tarixli 569 nömrəli fərmanı əsasında həyata keçirilir.

Daha əvvəl açıqlanmış rəsmi büdcə icrası məlumatlarına əsasən, 2024-cü ildə hərbi qulluqçuların mənzillə təmin olunması üçün 35 milyon manat vəsait ayrılıb. Həmin vəsait hesabına Mənzil İnşaatı Dövlət Agentliyinin Bakı şəhərindəki Hövsan Yaşayış Kompleksindən və Sumqayıt Yaşayış Kompleksindən ümumilikdə 512 tam təmirli mənzil alınıb və onların hərbi qulluqçuların mülkiyyətinə verilməsi rəsmiləşdirilib.

Bununla belə, 2027-ci ilin büdcə materiallarında mənzil təminatına və kirayə kompensasiyalarına ayrılan vəsaitlərin azaldılmasının konkret səbəbləri göstərilmir. Növbəti ildə neçə hərbi qulluqçunun mənzillə təmin ediləcəyi barədə də ayrıca məlumat verilmir.