İsraillə Səudiyyə Ərəbistanı arasında münasibətlərin normallaşması mümkündür və bu, bütövlükdə ərəb-İsrail münaqişəsinə son qoymuş olardı.

“Report” xəbər verir ki, bu fikri İsrailin Baş naziri Binyamin Netanyahu Təl-Əvivdə keçirilən təhlükəsizlik konfransında deyib.

“Əgər biz sülh çevrəmizi Səudiyyə Ərəbistanına qədər genişləndirsək, onda düşünürəm ki, ərəb-İsrail münaqişəsinə həqiqətən son qoyacağıq ... Fələstin problemini həll edəcəyik”, - B. Netanyahu bildirib.

Baş nazirin sözlərinə görə, İsrailin hərbi, kəşfiyyat, texnoloji və iqtisadi gücünün iştirakı ilə ümumi maraqlara əsaslanan sülhə doğru irəliləmək İsraillə qonşuları arasında münasibətlərin normallaşmasına dair razılaşmalar üçün möhkəm zəmin yaradacaq:

“Bu, iki iki şeyə nail olmağa yol açacaq: birincisi, sülh dairəsini genişləndirəcək, ikincisi, İrana qarşı dayaq rolunu oynaya bilər”.

“Düşünürəm ki, Səudiyyə rəhbərliyi rəsmi olaraq bunun bir hissəsi olmaq istədiklərinə qərar verərsə, biz irəliyə doğru nəhəng sıçrayış edəcəyik. Qeyri-rəsmi olaraq, onlar artıq bu işdə iştirak edirlər”, - siyasətçi əlavə edib.