“Aktrisa olacağımı heç vaxt düşünməmişdim. Çünki bizim ailədə kinoya yaxın adam olmayıb. Anam həkim, atam isə neftçi idi. Utancaq bir xanım idi. Bu sənətdə çox qadağalarım olub. Əvvəl atam, sonra isə həyat yoldaşım ailə qurandan sonra mənə qadağalar qoyub. O vaxt həyat yoldaşımı başa düşürdüm. Çünki xanımların aktrisa olmağını yaxşı qarşılamırdılar. Təbii ki, o bilirdi mənim istedadım var.  Deyirdi ki, Elmira, məhəbbət filmində bir obraz oynasan, o dəqiqə şayiə yayacaqlar ki, sən mənə xəyanət etmisən. Çünki dövr tamam fərqli idi. Kim-kiminlə çəkilirdisə onları bir-birinə yaraşdırıb, hətta sevgili belə edirdilər”.

 

Bunu Moderator.az-a açıqlamasında xalq artisti Elmira Şabanova deyib. O daha sonra əlavə edib.

“İndi hamı qızının aktrisa, rejissor olmağını istəyir. Hətta əlindən tutub rəqsə, aktrisa sənətinə gətirir. Həyat yoldaşım Rüfət Şabanovun qısqanclığına görə 40 yaşıma qədər evdə oturdum, heç bir yerdə çəkilmədim. Hamı 40 yaşdan sonra pedaqoji fəaliyyətlə məşğul idi, mən isə 40 yaşıma qədər məşğul oldu. Filmlərə çəkilməyə 40 yaşdan sonra başladım, bir növ gecikmişdim. Çünki rejissorlar mənə ancaq ana rolları verirdilər. Arzuladığım obrazların bir çoxu artıq geridə qalmışdı, geriyə də dönüş yox idi. Bir şeyə sevinirəm ki, qadağalar olsa da bu sənəti sevdim və kinolarda izim qaldı” deyə xalq artisti bildirib.

 

Elmira Şabanova daha sonra müasir filmlərdən danışıb.

“Seriallara baxıram, görürəm ki, mövzu kasadlığı var. Özüm də bəzən təəccüblənirəm ki, niyə ssenarilər bəsit olub?! Axı bizim yaxşı ssenaristlərimiz, yazarlarımız var. Yəqin ki, onlara ssenari yazmaq üçün şərait yaradılmır. Seriallarda ancaq dəbdəbəli evlər, bahalı yaşayış təbliğ olunur. Hansı seriala baxırsan ancaq dava görüntüləridir, kimsə kimisə öldürür, söyür, təhqir edir. Seriallar tərbiyəvi mövzuda olmalıdır. Təbii ki, mənə də dəvətlər gəlir, amma indiyə qədər qazandığım hörməti bir anda yerə vura bilmərəm. Ona görə də getmirəm. İnciyirlər də, amma mən belə ekran əsərində çəkilə bilmərəm. Yaxşı bir iş olarsa əlbəttə ki, gedib çəkilərəm” deyə xalq artisti bildirib.