Aİ Ukraynaya qarşıdakı dörd il ərzində silah təchizatı və hərbi təlimlər də daxil olmaqla 20 milyard avro dəyərində hərbi dəstək planı hazırlayır və ehtimal ki, bu plan Avropa Sülh Fondu vasitəsilə həyata keçiriləcək.

“AVESTA.AZ” xəbrə verir ki, bu barədə “Politico”nun Avropa redaksiyası öz diplomatik mənbələrinə istinadən məlumat yayıb.

Bu məbləğ ildə 5 milyard avroya bərabərdir ki, bu da təxminən Kiyevin 2022-ci ildə Aİ-dən aldığı və bu il alacağı ehtimal edilən hərbi yardımın məbləğinə bərabərdir.

Qəzetin qeyd etdiyi kimi, “Avropa İttifaqı növbəti dörd il ərzində Ukrayna silahlı qüvvələrinin 20 milyard avro həcmində təchizatını dəstəkləmək üçün məqsəd fondunun yaradılmasını təklif edəcək”. Bu yardım planı Avropa Komissiyasının dörd il müddətinə təklif etdiyi 50 milyard avroluq büdcə yardım paketini tamamlamaqdan ibarətdir və Avropa Komissiyası artıq Aİ ölkələrini qurumun büdcəsinə əlavə töhfələr verməyə çağırıb.

Nəşr bildirib ki, bu 20 milyard avro Aİ ölkələrinin Kiyev üçün silah, sursat və hərbi texnika üçün ehtiyat hissələrinin alınması, habelə Ukrayna Silahlı Qüvvələri üçün kadr hazırlığı xərclərinin qismən ödənilməsinə yönəldiləcək.