2024-cü ilin noyabrında Bakıda keçirilmiş COP29-da əldə edilmiş yeni qlobal iqlim maliyyələşdirilməsi hədəfi irəliyə doğru atılmış mühüm addımdır.

“AVESTA.AZ” xəbər verir ki, bunu BMT-nin İqlim Dəyişikliyi üzrə icraçı katibi Saymon Stil Braziliyada Rio Branko İnstitutunda çıxışı zamanı deyib.

O qeyd edib ki, yeni maliyyə hədəfi iqlim maliyyələşdirilməsinin minimum həcmidir.

“300 milyard dollar maksimum deyil, başlanğıc səviyyədir. İnkişaf etməkdə olan ölkələrə daha çox vəsaitin çatması həyati əhəmiyyət kəsb edir, çünki onlar borcların qarşılanması üçün xidmət və yüksək kapital xərcləri ilə mübarizə aparırlar”, - Stil söyləyib.

Onun sözlərinə görə, 10 il əvvəl Parisdə pul köçürmələri ilə bağlı razılıq əldə olunub: “Biz razılaşdıq ki, bütün maliyyə axınları iqlimlə bağlı öhdəliklərimizə uyğun olmalıdır. Beynəlxalq maliyyə sisteminin istiqamətini dəyişmək asan məsələ deyil. Amma bu il qarşımıza məqsəd qoyduq - maliyyələşmənin 1,3 trilyon dollar həcmində olmasını necə təmin edə biləcəyimizi addım-addım müəyyənləşdirməliyik (belə razılıq Bakıda da əldə olunub”.

"10 ildən bir qədər çox müddətdə biz demək olar ki, heç nədən 2 trilyon ABŞ dollarınadək yol qət etdik. Bununla yanaşı, dünya ölkələrinin üçdə ikisindən çoxu hələ də iqlim dəyişikliyi ilə mübarizə üzrə genişmiqyaslı tədbirlər görmək üçün maliyyə imkanları əldə etməyə can atır", - Stil bildirib.

Onun sözlərinə görə, bütün ölkələr zəruri maliyyələşdirmə təmin edilərsə, ilk növbədə 1,3 trilyon dollar həcmində Bakı-Belen yol xəritəsini həyata keçirməklə öz potensiallarını tam reallaşdıra biləcəklər.