Səhiyyə Nazirliyinin strukturuna daxil olan K.Y.Fərəcova adına Elmi-Tədqiqat Pediatriya İnstitutu tərəfindən "Böyük Qayıdış" Dövlət Proqramı çərçivəsində Ağdərə rayonunda məskunlaşmış azyaşlılar üçün səyyar formada kompleks tibbi müayinələr baş tutub.

AVESTA.AZ xəbər verir ki, bu barədə nazirlik rəsmi açıqlama yayıb.

Keçirilən tibbi tədbirin əsas məqsədi vətəndaşların sağlamlığının qorunması, xüsusilə də işğaldan azad olunmuş ərazilərə köçən ailələrin və onların övladlarının yüksəksəviyyəli tibbi xidmətlərlə əhatə olunmasıdır.

Səyyar aksiya zamanı İnstitutun peşəkar heyəti - pediatrlar, kardioloqlar, nevroloqlar, oftalmoloqlar, endokrinoloqlar, otorinolarinqoloqlar və digər ixtisas sahibləri xidmət göstəriblər.

Yoxlamalar zamanı uşaqların ümumi sağlamlıq vəziyyəti təhlil edilib, profilaktik baxışlar keçirilib, eləcə də zəruri laborator və instrumental müayinələr icra olunub. Aşkar edilən xəstəliklər və sağlamlıq problemləri ilə bağlı valideynlərə geniş izahat verilib, ehtiyac duyulduqda uşaqların ixtisaslaşmış tibb müəssisələrində müalicəyə cəlb olunması və dispanser nəzarətinə alınması üçün müvafiq istiqamətlər müəyyənləşdirilib.

Aksiya çərçivəsində valideynlər arasında maarifləndirmə işləri də aparılıb; onlara uşaqların düzgün inkişafı, rasional qidalanma rejimi, vaksinasiya prosesi, mövsümi xəstəliklərdən qorunma yolları və sağlam həyat tərzinin vacibliyi barədə ətraflı məlumatlar çatdırılıb. Səhiyyə Nazirliyinin K.Y.Fərəcova adına Elmi-Tədqiqat Pediatriya İnstitutunun tibbi briqadası tərəfindən Ağdərə rayonunda ümumilikdə 100-ə yaxın uşaq hərtərəfli tibbi baxışdan keçirilib.

Müayinə prosesində azyaşlıların ümumi klinik və antropometrik göstəriciləri yoxlanılıb, görmə və eşitmə funksiyaları test edilib, ürəyin exokardioqrafiyası, qarın boşluğu orqanlarının ultrasəs müayinəsi (USM) həyata keçirilib və nevroloji statusları qiymətləndirilib.

Qeyd etmək lazımdır ki, "Böyük Qayıdış" Dövlət Proqramına uyğun olaraq, azad edilmiş torpaqlarda səhiyyə infrastrukturunun mərhələli şəkildə qurulması və əhalinin tibbi təminatının yaxşılaşdırılması məqsədilə mütəmadi tədbirlər görülür. K.Y.Fərəcova adına Elmi-Tədqiqat Pediatriya İnstitutunun təşkilatçılığı ilə reallaşdırılan bu səyyar tibbi aksiyalar da həmin tədbirlər planının tərkib hissəsi kimi bölgədəki uşaqların sağlamlığının mühafizəsinə ciddi dəstək verir. Səhiyyə Nazirliyi tərəfindən gələcək dövrlərdə də işğaldan azad olunmuş və bərpa edilən ərazilərdə uşaqlar və digər əhali qrupları üçün həm profilaktik, həm də müalicəvi xarakterli tibbi aksiyaların davamlı şəkildə təşkili nəzərdə tutulur.