Bu gün Xalq artisti Fəxrəddin Manafovun doğum günüdür. Onun 71 yaşı tamam olur.

Manafov Fəxrəddin Manaf oğlu 1955-ci ildə Xankəndidə anadan olub. Bir müddət sonra isə ailə Bakıya köçüb. Uşaqlıqdan futbola böyük marağı olub.

Çox yaxşı futbol oynayırmış. Hətta yaxın adamlar, ailə üzvləri onun gələcəkdə futbolçu olacağını düşünürmüşlər. 16 yaşı olarkən, 1971-ci ildə A.M.Şərifzadə adına Aktyor evində kinomexanik Aktyorlar evində kinomexanik kimi işə düzələn Fəxrəddin bir müddət sonra Almaniyaya hərbi xidmətə yola düşmüşdür.

Hərbi xidmətdən qayıdıb. 1975-1980-ci illərdə M.Əliyev adına Azərbaycan Dövlət İncəsənət İnstitutunda təhsil alıb. 1989-1993-cü illərdə "Yuğ" Dövlət teatrında aktyor işləyib.

1978-ci ildən Cəfər Cabbarlı adına "Azərbaycanfilm" kinostudiyasında filmlərə çəkilib.Fəxrəddin Manafov gənclik illərində Tədris teatrında işləyən vaxt Vahidə adlı xanımla tanış olur. Vahidə xanım da həmin teatrda aktrisa kimi fəaliyyət göstərir. Sonradan məşhur diktora çevrilən Vahidə xanımla Fəxrəddin Manafov ailə həyatı qururlar. Onların heç bir zaman övladı olmur. Vahidə xanım dəfələrlə aktyora başqa qadınla evlənməyi təklif etsə də, Xalq artisti xanımının bu istəyini qətiyyətlə rədd edir. Bir-birlərinə böyük məhəbbəti olan cütlüyün bu sevgisi illərlə davam edir. 2021-ci ilin martın 3-də aktyorun həyat yoldaşı Vahidə Manafova uzun sürən xəstəlikdən sonra dünyasını dəyişir. Bu itki Xalq artisti üçün ağır olur. O, müsahibələrinin birində deyir:

"Mənim ən yaxınım, böyük ağrı ilə deyirəm ki, dünyasını dəyişdi. Bu, həyat yoldaşım Vahidə xanım idi. Mən hər gün səhər gözümü açanda da, gecə yuxuda da, yatmazdan qabaq da bu ağrını yaşayıram. Fikirləşirəm ki, artıq qəribə bir ömür başlayıb həyatımda... Mən hətta ən yaxınlarıma, anama və atama belə demədiklərimi Vahidəyə deyirdim. Amma artıq bu gün bunları deyə biləcək kimsəm yoxdur".

Aktyor çoxsaylı ekran işində bir çox yadda qalan obrazlar yaradıb.

Onun filmoqrafiyası "Doğma sahillər" (film 1989), "Lətifə" (film 1989), Ö"lsəm... bağışla" (film 1989), "Gecə qatarında qətl" (film 1990), "Təxribat" (film 1990), "Qətldən yeddi gün sonra" (film 1991), "Qəzəlxan" (film 1991), "Dünən, bu gün, sabah" (film 1992), "Təhminə" (film 1993), "Nigarançılıq" (film 1998), "Otel otağı" (film 1998), "Etimad telefonu" (film 2001), "Bir anın həqiqəti" (film 2003), "Ovsunçu" (film 2002) kimi filmlərlə zəngindir.

Ən sevilən obrazı isə "Təhminə" filmindəki Zaurdur. Fəxrəddin Manafov 1987-ci ildə Azərbaycanın Əməkdar artisti, 2000-ci ildə isə Xalq artisti fəxri adlarına layiq görülub.