Azad olunmuş ərazilərə gedən turistlər və vətəndaşlar şəhidlərin ruhuna, qazilərə hörmətlə yanaşmalıdırlar.

BAKU.WS xəbər verir ki, bunu "Report"a açıqlamasında 44 günlük Vətən müharibəsində şəhid olan Xalid Gözəlovun atası Həsən Gözəlov deyib.

Onun sözlərinə görə, ümumiyyətlə, hər yerdə, xüsusilə də işğaldan azad olunmuş ərazilərdə müəyyən davranış qaydalarına riayət edilməlidir:

"Orada Azərbaycan oğulları can qoyub, əziyyət çəkiblər. Ona görə də azad olunmuş ərazilərə gedən insanlar o yerlərə hörmətlə yanaşmalıdırlar. Vicdanı olan hər bir şəxs oraları təmiz saxlamalı və şəhidlərimizin qanı bahasına azad edilmiş torpaqlara ehtiram göstərməlidir. Təəssüf ki, bəzi insanlar daşların, divarların, evlərin və digər yerlərin üzərinə adlarını və müxtəlif ifadələr yazırlar. Bu, qətiyyən düzgün deyil".

Şəhid atası elə davranışlara yol verən şəxslərə çağırış edib:

"Kimin hansı fikri və ya arzusu varsa, bunun üçün nəzərdə tutulmuş xüsusi lövhələrdən, digər vasitələrdən istifadə edə bilər. Amma divarlara, daşlara və digər yerlərə yazı yazmaq yolverilməzdir. Bu cür hərəkətlər həmin ərazilərin görünüşünü və tarixi-mədəni dəyərini də korlayır".

Şəhid Ruhid İslamlının anası Təranə Şükürova bildirib ki, şəhidlərin adlarının qayalara və digər səthlərə yazılması onların xatirəsinə hörmət deyil:

"Şəhidlərin adlarının yaşadılması üçün belə üsullara ehtiyac yoxdur. Mən istəməzdim ki, şəhidimin adı boya və ya başqa vasitələrlə yazılsın. Onsuz da o, vətən uğrunda döyüşərək öz qanı ilə adını həmin qayalara yazıb. Şəhidlər nəinki adlarını qayalara, tarixə və dünyaya yazıblar. Heç vaxt razı olmaram ki, övladımın adı ayaq altında qalsın. Digər şəhidlər də mənim balamdır. Əgər bu hərəkəti etməklə onlara hörmət etmək istəyirlərsə, bunun əvəzinə şəhidlərimizi ansınlar, onları daim xatirələrində yaşatsınlar".

Şəhid Elvin Abbasovun anası Bahar Abbasova da övladının adının bu şəkildə yazılmasını istəmədiyini söyləyib:

"Mən qətiyyən istəmərəm ki, övladımın adı belə yerlərə yazılsın. Valideynlərin icazəsi olmadan şəhidlərin adlarının yazılması yolverilməzdir. Bu, xoş qarşılanacaq hal deyil".

Şəhid Turqut Xəlilbəylinin qardaşı Xəlil Xəlilbəyli isə şəhid adlarının bu formada qayalara yazılmasını doğru hesab etmədiyini vurğulayıb:

"Hər bir halda belə yanaşma yolverilməzdir. Başa düşürəm ki, şəhidlərin adını yaşatmaq üçün yazırlar. Lakin biz bilmirik, həmin yer necə yerdir, ora kimlər gəlib-gedir. Sabah həmin səthlərə başqa hansı sözlərin yazılacağını da bilmirik. Bu səbəbdən şəhid adlarının bu formada qayalara yazılması xoş deyil".

Xatırladaq ki, Şuşada turistlərin adlarının yazıldığı qayaların görüntüləri paylaşılıb. Adları Şuşaya səfər edən turistlərin yazdığı iddia olunur.