Azərbaycanın qeyri-neft-qaz sektoru üzrə ixracında artım qeydə alınıb.

BAKU.WS bu barədə İqtisadi İslahatların Təhlili və Kommunikasiya Mərkəzinə istinadən xəbər verir.

Qeyd edilib ki, bu ilin yanvar-avqust aylarında qeyri-monetar qızıl nəzərə alınmadan qeyri-neft-qaz ixracının dəyəri ötən ilin eyni dövrü ilə müqayisədə 17,6% artaraq 2,8 milyard ABŞ dollarına yüksəlib.

Təkcə avqust ayında bu göstərici illik müqayisədə 13% artaraq 350,8 milyon dollar təşkil edib. Hesabat dövründə yeyinti məhsullarının ixracı 80,7 milyon dollar, qeyri-yeyinti məhsullarının ixracı isə 11,4% artaraq 251,1 milyon dollar olub.

Məhsul qrupları üzrə ən yüksək artım şəkərin ixracında qeydə alınıb. Şəkər ixracının dəyəri 2,3 dəfə, pambıq ipliyinin 62,2%, alüminium və ondan hazırlanan məmulatların 42,8%, meyvə-tərəvəzin isə 13,7% artıb.

Aqrar məhsulların ixracı 19,2% artaraq 732 milyon dollara, aqrar-sənaye məhsullarının ixracı 22,1% artaraq 255,8 milyon dollara çatıb. Aqrar və aqrar-sənaye məhsullarının ümumi ixracı isə 19,9% artaraq 987,8 milyon dollar təşkil edib.