Gələn il yanvarın 1-nə Azərbaycanın xarici dövlət borcunun 6 381 milyon ABŞ dolları (10 847 milyon manat) olacağı proqnozlaşdırılır.

“AVESTA.AZ” xəbər verir ki, bu barədə nazirliyin açıqladığı “2023-cü ilin dövlət və icmal büdcələrinin yarımillik icrasına dair arayış və ilin sonuna gözləntilər sənədi”ndə bildirilir.

Sənəddə deyilir ki, daxili dövlət borcunun isə 6 688 milyon manat olmaqla ümumi dövlət borcunun 17 536 milyon manat təşkil etməsi gözlənilir.

Bu ilin sonuna xarici dövlət borcunun 49 %-i 5 ilə qədər, 42,6 %-i 5 ildən 10 ilə qədər, 8,4 %-i isə 10 ildən artıq müddətə kreditorlara ödənilməli olacaq. Xarici dövlət borcu üzrə yeni cəlb olunacaq borc öhdəliklərinin 10 ilə qədər müddətə müvafiq istinad dərəcəsi üstəgəl 0,65 % dərəcəsi ilə, 10-20 illik müvafiq istinad dərəcəsi üstəgəl 0,8 % dərəcəsi ilə, 20 ildən artıq müddətə isə müvafiq istinad dərəcəsi üstəgəl 0,9 % dərəcəsi ilə cəlb olunacağı nəzərdə tutulur.

Daxili dövlət borcunun 40,5 %-ini daxili maliyyə bazarlarında emissiya olunmuş dövlət istiqrazları təşkil edəcək. İlin sonuna dövriyyədə olan dövlət istiqrazlarının 13 %-i 1 illik, 66,1 %-i 2-3 illik, 20,9 %-i isə 5-7 illik istiqrazların payına düşəcək. Daxili dövlət borcuna xidmət xərcləri 265 milyon təşkil edəcək.