"Geomaqnit qasırğalarla bağlı daha bir problem kosmik zibillə toqquşmaq problemidir" 

 

"SpaceX" şirkətinin sahibi İlon Mask kosmik hava üzrə ekspertlərdən mühüm xəbərdarlıq alıb. 

 

Onlar iddia edir ki,  Günəşdə tez-tez baş verən partlayışlar və

koronar kütlələrin ifrazı Yerdə geomaqnit qasırğalarına səbəb olur və bu, "Starlink" peyklərini sıradan çıxara bilər.

 

Avesta.az xəbər verir ki, bu barədə Britaniyanın "Daily Expess" nəşri məlumat yayıb.

 

Nəşr xatırladıb ki, ötən həftə Günəşdə AR3058 adlı yeni ləkə əmələ gəlib. O, M sinifli güclü Günəş partlayışına və koronal kütlənin ifrazına səbəb olub. Onlar Yerdə bir neçə gün davam edən güclü geomaqnit qasırğalarının meydana çıxmasına səbəb olub. 

 

Mütəxəssislərin sözlərinə görə, Günəşdə güclü püskürmələr ehtimalı hələ ki, saxlanılır.

 

Hal-hazırda Yerətrafı orbitdə Amerikanın "Starlink" və Britaniyanın "OneWeb" kimi minlərlə rabitə peykləri işəyir.

 

İlon Mask əmin edir ki, o, kosmosa əlavə olaraq özünün daha 42 min peykini göndərməyi planlaşdırır.

 

Lakin kosmik havanı izləyən mütəxəssislər Maskı xəbərdar edib ki, getdikcə daha tez-tez baş verən güclü geomaqnit qasırğalar "Starlink" peyklərini zədələyə bilər. 

 

Bu peyklərin sıradan çıxması ehtimalı çox yüksəkdir. Amerikalı milyardçının avadanlığı ilə bağlı oxşar vəziyyət bundan öncə də baş verib,  o zaman 49 peykin buraxılışından sonra geomaqnit qasırğası baş verib və onların 40 ədədi sıradan çıxıb.

 

Qəzet yazır ki, geomaqnit qasırğalarla bağlı daha bir problem var, bu da kosmik zibillə toqquşmaq problemidir.

 

Ekspertlərin məlumatına görə, hazırda Yer orbitində ölçüləri 10 sm-dən böyük olan təxminən 20 min obyekt var. Aşağı Yer orbitində peyklərin və istənilən başqa obyektin, o cümlədən kosmik zibilin yerdəyişməsini ABŞ kosmik müşahidə Şəbəkəsi izləyir (mütəxəssislər peyklərin kosmik zibillə toqquşmamasını izləyir və peyk sahibləri olan şirkətlərə təhlükə olduğu zaman tədbirlər görməsi üçün gündəlik xəbərdarlıq edirlər).

 

Lakin güclü geomaqnit qasırğalar zamanı ekspertlər praktiki olaraq belə obyektlərin uçuş trayektoriyalarını dəqiq proqnozlaşdırmaqda acizdir. Ona görə də peyklər təkcə bilavasitə geomaqnit qasırğadan zərər çəkmir, həm də qeyri-dəqiq məlumatlardan sıradan çıxa bilər ki, bu da kosmik zibillə toqquşmaya gətirib çıxara bilər, alimlər xəbərdarlıq edir.

 

Belə ki, meteoroloq Ceykob Mors güman edib ki, bu yaxınlarda baş verən geomaqnit qasırğa artıq "Starlink" peyklərinin birini sıradan çıxarıb. O, hətta özünün "Twitter" səhifəsində səmada uçan obyektin fotosunu dərc edib və onun Maskın peyki olduğunu güman edib.

 

Öz növbəsində Kolorado ştatının Boulder şəhərində yerləşən Universitetdən tədqiatçı Tom Berger əmin edib ki, hal-hazırda Yerətrafı orbitdə xaos riski sürətlə artmaqdadır.

 

"Son 20 ildə orbitdə müxtəlif obyektlərin sayı 4 dəfə artıb, ona görə də onların toqquşma riski həndəsi silsilə ilə artır. 

 

Hazırda bundan yan keçmək üçün peyklər daha tez-tez manevr etməlidir, axı, əvvəllər belə şey olmayıb", - Berger qeyd edib.