Bu ilin sonuna Azərbaycanın dövlət borcunun (xarici və daxili) ümumi məbləği 26 milyard 803,6 milyon manat səviyyəsində olacağı gözlənilir.

"Report" xəbər verir ki, bu barədə Maliyyə Nazirliyinin "2024-2027-ci illər üzrə Ortamüddətli Büdcə Çərçivəsi"ndə bildirilib.

Məlyumata görə, bu, 119 milyard 650 milyon manat məbləğində proqnozlaşdırılan ÜDM-nin 22,4 %-ni təşkil edəcək. Həmin dövrdə xarici dövlət borcu 10 milyard 848,2 milyon manat (6 milyard 381,3 milyon ABŞ dolları) və ya ÜDM-nin 9,1 %-i həcmində, daxili dövlət borcu isə 15 milyard 955,4 milyon manat və ya ÜDM-nin 13,3 %-i həcmində olacağı gözlənilir.

2024-cü ilin sonuna Azərbaycanın dövlət borcunun ümumi məbləği 27 milyard 678 milyon manat səviyyəsində olacağı gözlənilir və 118 milyard 383,3 milyon manat məbləğində proqnozlaşdırılan ÜDM-nin 23,4 %-ni təşkil edəcək. Həmin dövrdə xarici dövlət borcu 8 milyard 898,7 milyon manat (5 milyard 234,5 milyon ABŞ dolları) və ya ÜDM-nin 7,5 %-i həcmində, daxili dövlət borcu isə 18 milyard 779,4 milyon manat və ya ÜDM-nin 15,9 %-i həcmində olacağı proqnozlaşdırılır.

"Beləliklə, ümumilikdə yeni çağırışlarla əlaqədar yaranan əlavə maliyyə tələbatının təmin edilməsi üçün icmal büdcənin qeyri-neft baza kəsirinin qeyri-neft ÜDM-ə nisbət göstəricisinin hədəflənən yuxarı həddinin 2024-cü ilin sonuna 24 % müəyyən edilməsi, ortamüddətli dövrün sonuna (2027-ci il) 17,5 %, dövlət borcunun ÜDM-ə nisbət göstəricisi üzrə isə 2027-ci ilin sonuna hədəflənən yuxarı həddin 30 % səviyyəsində olması təklif olunur", - Maliyyə Nazirliyi qeyd edir.