Azərbaycanın audit sisteminin beynəlxalq standartlar əsasında təkmilləşdirilməsi zəruridir.

"AVESTA.AZ" xəbər verir ki, bunu Auditorlar Palatasının icraçı direktoru Səbuhi Gülməmmədov bu gün Bakıda “Hesabatlıq və şəffaflıq yeni dövrün çağırışları kontekstində” mövzusunda keçirilən forumda deyib.

Onun sözlərinə görə, bu, ölkə iqtisadiyyatında maliyyə şəffaflığını, büdcə vəsaitlərinin təyinatına uyğun istifadə olunmasını təmin etməklə Azərbaycanın iqtisadi qüdrətinin möhkəmləndirilməsinə xidmət edir.

"Yeni dövrün çağırışları Azərbaycanda auditorlardan bir sıra vacib problemlərin həllini tələb edir. Milli İqtisadiyyat inkişaf etdikcə və onun dünya təsərrüfat sisteminə inteqrasiyası gücləndikcə iqtisadi maliyyə münasibətlərinin də şəffaflığın təmin olunmasında, iqtisadi cinayətkarlıq və korrupsiyaya qarşı mübarizədə auditin imkanlarından istifadə etmək zərurəti yaradır. Bunun üçün müstəqil maliyyə nəzarəti sahəsində mütərəqqi dünya təcrübəsini öyrənmək və milli iqtisadiyyatın xüsusiyyətlərini nəzərə almaqla ölkəmizdə tətbiqini genişləndirmək xüsusi əhəmiyyət kəsb edir", - deyə o qeyd edib.

S. Gülməmmədov ötən dövr ərzində Auditorlar Palatasının 7 dövlət proqramının iştirakçısı oldüğunu diqqətə çatdıraraq, üzərlərinə düşən vəzifəni uğurla yerinə yetirdiklərini diqqətə çatdırıb: "Korrupsiyaya qarşı mübarizənin gücləndirilməsi, şəffaflığın artırılması, kölgə iqtisadiyyatının aradan qaldırılması, maliyyə hesabatlılığının təkmilləşdirilməsi, maliyyə vəsaitlərindən istifadənin səmərəliliyinin gücləndirilməsi, açıq və demokratik prinsiplərə əsaslanan dövlət quruculuğunun sürətləndirilməsi, regionların və sahibkarların süni maneələr və müdaxilələr olmadan inkişaf etdirilməsi kimi mühüm məqsədləri özündə ehtiva edən dövlət proqramları çərçivəsində Auditorlar Palatası bir çox mühüm problemlərin həllinə nail olub".