Təhlükəsizliyin təmin edilməsi Almaniyanın 2025-ci il üçün razılaşdırılmış büdcə layihəsinin əsas prioritetidir.

“AVESTA.AZ” Almaniya hökumətinin mətbuat xidmətinə istinadən xəbər verir ki, bu barədə kansler Olaf Şolts bildirib.

“Çətin vaxtlarda Almaniya sabitliyin lövbəri olmalıdır. Almaniya hökumətinin buna görə məsuliyyəti var, ona görə də biz indi təsdiq olunmuş büdcə layihəmizdə aydın prioritetləri müəyyənləşdiririk. Əsas diqqət təhlükəsizlik məsələsidir, onsuz qalan şeylərin heç biri olmayacaq”, - o deyib.

Eyni zamanda, kansler xatırladıb ki, Almaniya ÜDM-in 2 %-dən çoxunu müdafiəyə sərf etməyi öhdəsinə götürür.

“Polisimizi və digər təhlükəsizlik orqanlarını təchiz etmək üçün əlavə təxminən 1 milyard avro da lazım gələcək” – Şolts vurğulayıb.

Xatırladaq ki, bu gün Almaniya Nazirlər Kabineti 481 milyard avro dəyərində büdcə layihəsini təsdiqləyib. Amma onun hakim koalisiyada təsdiqlənməsi planlaşdırıldığından daha uzun çəkib. Belə ki, koalisiyaya daxil olan partiyaların bəzi siyasətçiləri arasında ictimai mübahisələr yaşanıb, bəzi deputatlar hökumətə dəstəyi dayandırmaq təhdidləri səsləndiriblər.