Bu gün mediada yayılan məlumata görə, Bakının mərkəzində yerləşən Nəbatat bağında 7 yaşlı uşağı ilan sancıb. Onun vəziyyətinin ağır olduğu deyilir. Bu hadisə bir çox ailəni və ictimaiyyəti narahat edib: Bakıda doğrudanmı zəhərli ilanlar var?

Məsələ ilə bağlı BAKU.WS-ə açıqlama verən AMEA Zoologiya İnstitutunun dosenti, biologiya üzrə fəlsəfə doktoru Səkinə Hacıyeva bildirib ki, hadisə təəccüblü görünsə də, mümkündür.

Onun sözlərinə görə, Bakı və Abşeron iqlim baxımından yarımsəhra və quru subtropik zonaya aiddir. Bu mühit zəhərli gürzə (vipera lebetina) üçün əlverişlidir.

"Bakıda gürzə ilanları var. Gürzələr daha çox daşların, kolların altında sərin yerlərdə dincəlirlər. Bu ilanlar gündüzlər dincəlir gecələr isə ova çıxırlar. Gürzələr gecə dovşan balalarını, siçovulları ovlayıb yeyirlər. 

Paytaxt iqlimində ən çox müşahidə olunan ilan sayılan gürzələrin də bir çox növü var". 

Mütəxəssisin qeyd edib ki, ilanlar daha çox xarabalıqlarda, səhra-yarımsəhra ərazilərdə, insanların az məskunlaşdığı yerlərdə yaşayırlar.

"Nəbatat bağında ilanlar təsadüfən ola bilər. Nəbatat bağının yerləşdiyi yer qədimi qəbristanlıq olub. Bizdə də (red: Zoologiya İnstitutunun həyətində) arabir ilanlara rast gəlinir. Ola bilsin bağın yuxarı hissəsində, açıq, günəşli ərazidə ilan olub. O hissə də qeyd etdiyim kimi qədim Bakı Qəbristanlığının yeridir. Onun da arxası Zoologiya İnstitutudur", - deyə o vurğulayıb.

Banu Hüseynli