Qaraciyər piylənməsi son illər geniş yayılan sağlamlıq problemlərindən biri hesab olunur. Mütəxəssislər bildirirlər ki, düzgün qidalanma bu problemin qarşısını almaqda mühüm rol oynayır.

AVESTA.AZ xəbər verir ki, həkimlərin sözlərinə görə, bəzi qidalar qaraciyərdə yağ toplanmasının azalmasına kömək edir və orqanın fəaliyyətini yaxşılaşdırır. Xüsusilə tərəvəz və göyərtilərin müntəzəm qəbulu qaraciyərin sağlamlığı üçün faydalıdır. Brokoli, ispanaq, kələm və digər yaşıl tərəvəzlər antioksidantlarla zəngin olduğu üçün orqanizmdə iltihabın azalmasına kömək edir.

Balıq da qaraciyər üçün faydalı qidalar arasında göstərilir. Somon və skumbriya kimi yağlı balıqlarda olan omeqa-3 yağ turşuları qaraciyərdə yağ yığılmasını azaltmağa kömək edir.

Bundan əlavə, zeytun yağı, qoz-fındıq və tam taxıl məhsulları da qaraciyərin fəaliyyətini dəstəkləyən qidalar hesab olunur. Bu məhsullar maddələr mübadiləsini yaxşılaşdıraraq orqanizmdə artıq yağın toplanmasının qarşısını alır.

Həkimlər eyni zamanda şəkərli içkilərin, çox yağlı və emal olunmuş qidaların qəbulunu azaltmağı tövsiyə edirlər. Sağlam qidalanma ilə yanaşı, müntəzəm fiziki aktivlik də qaraciyər piylənməsinin qarşısını almaqda mühüm rol oynayır.