Çinin şərq sahillərinə yaxınlaşan güclü "Delfin" tayfunu ilə əlaqədar 420 mindən çox sakin təhlükəsiz ərazilərə köçürülüb.

AVESTA.AZ xəbər verir ki, bu barədə Çin Mərkəzi Televiziyası məlumat yayıb.

Məlumata görə, Çjetszyan əyalətinin Tayçjou şəhərində 390 mindən çox sakin müvəqqəti olaraq təxliyə olunub. Şanxayda isə sahilyanı ərazilərdən 30 mindən çox insan təhlükəsiz yerlərə yerləşdirilib.

Çin Meteorologiya İdarəsi avqustun 8-də tayfunla bağlı təhlükə səviyyəsini dördüncü pillədən üçüncü pilləyə yüksəldib. Ölkədə fövqəladə hallara reaksiya sistemi dörd səviyyədən ibarətdir və birinci səviyyə ən yüksək təhlükə dərəcəsi hesab olunur.

Məlumata görə, "Delfin" tayfununda küləyin sürəti saniyədə 40 metrdən artıqdır. Güclü təbiət hadisəsinin avqustun 9-dan 10-na keçən gecə Çinin şərq sahillərinə çatacağı gözlənilir.