Bakının qədim küçələrindən birində, İstiqlaliyyət küçəsi 27 ünvanında yerləşən Maqsud İbrahimbəyov Yaradıcılıq Mərkəzi yazıçının həyat və yaradıcılıq dünyasını yaşadan məkanlardan biridir.

AVESTA.AZ PhotoStock.az-a istinadən xəbər verir ki, burada ədəbiyyat, xatirə və Bakı ruhu bir-birinə qarışaraq keçmişi bu günlə birləşdirir. Maqsud İbrahimbəyov 11 may 1935-ci ildə Bakıda anadan olub.

Yazıçı, dramaturq və ssenarist kimi Azərbaycan ədəbiyyatında özünəməxsus iz qoyub. Onun əsərlərində Bakı həyatı, insan münasibətləri və zamanın dəyişdirdiyi talelər xüsusi yer tutur. Mərkəz yazıçının uzun illər yaşadığı evdə yaradılıb. Burada onun şəxsi əşyaları, kitabları, əlyazmaları, fotoşəkilləri və yaradıcılığı ilə bağlı digər materiallar qorunur.

Məkan həm yazıçının irsinin nümayiş etdirildiyi muzey, həm də müxtəlif mədəni tədbirlərin keçirildiyi yaradıcılıq ocağı kimi fəaliyyət göstərir.

Mərkəzdə ədəbi görüşlər, sərgilər, təqdimatlar və digər mədəni tədbirlər təşkil olunur. Burada Maqsud İbrahimbəyovun yaradıcılığı ilə yanaşı, Azərbaycan ədəbiyyatı və incəsənətinin müxtəlif istiqamətləri də təbliğ edilir. Mərkəzin xüsusi atmosferi isə yazıçının yaşadığı evin qorunub saxlanılması ilə bağlıdır. Buradakı əşyalar və məkanın özü ziyarətçini sanki başqa bir zamana aparır. Bu evdə Bakı yalnız bir şəhər kimi deyil, Maqsud İbrahimbəyovun əsərlərində yaşayan, küçələri və insanları ilə yaddaşa çevrilən bir şəhər kimi görünür.

Qalereya