Naməlum silahlılar Ekvador prezidentliyinə namizəd Daniel Noboanın olduğu avtomobil karvanının yanında atəş açıb.

“Report” xəbər verir ki, bu barədə “El Universo” qəzeti məlumat yayıb.

Qəzetin yazdığına görə, prezidentliyə namizəd hadisə zamanı xəsarət almayıb.

"Ərazidə müvafiq yoxlamalar aparıldıqdan sonra Duranda prezidentliyə namizəd Daniel Noboaya hücum istisna edilir", - Ekvador polisi X sosial şəbəkəsində bildirib.

Qeyd edək ki, Ekvador prezidentliyinə digər namizəd Vilyavisensionun avqustun 9-da öldürülüb. Siyasətçi Kito şəhərində keçirilən mitinqdə başından üç güllə yarası ilə qətlə yetirilib. Hazırkı Prezident Gilyermo Lasso ölüm faktını təsdiqləyib və təhlükəsizlik kabinetinin fövqəladə iclasını elan edib, ölkədə fövqəladə vəziyyət tətbiq olunub.

Polis sui-qəsddə şübhəli bilinən bir neçə şəxsi saxlayıb, onlardan biri həbs zamanı atışma zamanı aldığı yaralardan dünyasını dəyişib.

Avqustun 15-də isə “Vətəndaş İnqilabı” siyasi hərəkatının lideri Pedro Brionesin öldürülməsi xəbəri yayılıb.