Mütəxəssislər öd kisəsi ilə bağlı cəmiyyətdə geniş yayılmış bir sıra yanlış təsəvvürlərin hələ də aktuallığını qoruduğunu bildirirlər. Onların sözlərinə görə, bu miflər bəzi hallarda insanların sağlamlığı üçün risk yarada bilər.

AVESTA.AZ xəbər verir ki, ən çox yayılan fikirlərdən biri öd kisəsinin çıxarılmasından sonra normal həyatın mümkün olmadığı iddiasıdır.

Həkimlər qeyd edirlər ki, insan orqanizmi uyğunlaşma qabiliyyətinə malikdir və əməliyyatdan sonra da öd ifrazı davam edir. Sadəcə bu proses əvvəlki kimi hissə-hissə deyil, fasiləsiz şəkildə baş verir. Qısa uyğunlaşma dövründən sonra isə insanlar adi qidalanma rejiminə qayıda bilirlər.

Digər geniş yayılmış yanlış fikir öd kisəsinin müxtəlif "təmizləmə" üsulları ilə, məsələn, yağ və turşulu məhsullar vasitəsilə təmizlənə biləcəyidir. Mütəxəssislər xəbərdarlıq edirlər ki, bu cür üsullar təhlükəli ola bilər və ciddi fəsadlara yol aça bilər. Belə "təmizləmələr" zamanı yaranan kütlələr daş deyil, qəbul edilən maddələrin qalıqlarıdır.

Üçüncü mif isə öd kisəsinin sağlamlığı üçün bütün yağların rasiondan çıxarılması ilə bağlıdır. Həkimlər bildirirlər ki, bu yanaşma əks təsir yaradır. Yağların tam məhdudlaşdırılması ödün durğunlaşmasına və nəticədə yeni daşların yaranmasına səbəb ola bilər. Buna görə də rasionda faydalı yağların olması vacib hesab edilir.

Son olaraq, öd daşlarının yalnız yağlı qidalardan yarandığı fikri də düzgün hesab olunmur. Mütəxəssislər qeyd edirlər ki, sürətli arıqlama və az hərəkətli həyat tərzi də bu problemin yaranmasında mühüm rol oynayır.

Həkimlər vətəndaşlara sağlamlıqları ilə bağlı qərar verərkən sosial şəbəkələrdə yayılan məsləhətlərə deyil, peşəkar tibbi tövsiyələrə əsaslanmağı məsləhət görürlər.