Azərbaycanda aqrar sektorda tətbiqi planlaşdırılan məhsul şəhadətnaməsi fermerlərin problemlərini azalda bilər.

BAKU.WS report-a istinadən xəbər verir ki, bunu Milli Məclisin Aqrar siyasət komitəsinin sədri Tahir Rzayev qurumun iclasında - "Məhsul şəhadətnaməsi haqqında" qanun layihəsinin müzakirəsində bildirib.

Onun sözlərinə görə, bir neçə ildir ki, pambıqçı fermerlər tədarükçülərlə müqavilə bağlayır, onlardan müəyyən məhsulları götürür, əvvəlcədən müəyyən qədər pul alır: "Amma bu ödəniş çox vaxt ilin sonuna gəlib çıxır. Fermer də ilin sonunda aldığı vəsaitlə təsərrüfatını yaşada bilmir. Çünki ona əvvəldən pul lazımdır ki, torpaqda şum aparsın, gübrə versin. Ən effektiv yol məhsul şəhadətnaməsinin tətbiq olunmasıdır".

"Bu yaxınlarda Kənd Təsərrüfatı Nazirliyinin böyük bir tədbirində iştirak etdik. Bir neçə rayonun fermerləri orada iştirak edirdi. Orada suallar qaldırıldı ki, məhsul şəhadətnaməsini buraxan adam öhdəlik götürür, amma bu məhsulu verə bilmədi. Bəs nə etməlidir? Ancaq qanun layihəsində açıq yazılır ki, bu, başqa ərzaqla, əmtəə ilə və yaxud pul vəsaiti ilə əvəzləşdirilə bilər. Təbii ki, fermer məhsulu verməyə bilər. Bəs nə etməlidir? Onda həmin şəxs aqrar sığortaya müraciət edib oradan ödəniş ala bilər. Ya da özünün pulu varsa öhdəliyini yerinə yetirə bilər. Və yaxud heyvan verə bilmirsə, digər məhsulla borcverəni razı sala bilər. Bu, qanunda yazılır. Ona görə təşvişə ehtiyac yoxdur ki, bu məhsulu verə bilmədi, borclu qalacaq. Xeyr. Hər bir sahibkarın müəyyən imkanı var və o imkanlar daxilində bu məsələləri həll edə bilər. Mülki Məcəlləyə və "İcra haqqında" qanuna ediləcək dəyişikliklərlə məhsul şəhadətnaməsi hüquqi status alacaq", - deyə deputat əlavə edib.