Bir neçə gün sonra müqəddəs Ramazan ayı başlayır və milyonlarla insan oruc tutmağa hazırlaşır. Oruc tutmaq həm mənəvi təmizlənmə, həm də bədənin dincəlməsi baxımından böyük əhəmiyyət daşıyır. Lakin orqanizmin bu müddətə uyğunlaşması üçün bəzi vacib məqamlara diqqət yetirmək lazımdır.

AVESTA.AZ həmin məlumatları diqqətinizə çatdırır. 

Orucluq üçün bədəni necə hazırlamalıyıq?

Oruc tutmazdan əvvəl qidalanma rejiminə tədricən dəyişiklik etmək lazımdır. Əks halda, ilk günlərdə baş ağrısı, halsızlıq və həzm problemləri kimi hallar yaşana bilər. Oruc tutmağa hazırlıq üçün aşağıdakı məqamlara əməl etmək tövsiyə olunur:

-Şəkər və kafein istehlakını azaltmaq (çünki birdən-birə dayandırmaq baş ağrısına səbəb ola bilər).

-Su qəbulunu artırmaq və bədəni susuz qalmamaq üçün tədricən alışdırmaq.

-Ağır yeməklərdən çəkinərək daha yüngül və balanslı qidalar qəbul etmək.

Sahur və iftar zamanı necə qidalanmalıyıq?

Oruc zamanı düzgün qidalanma sağlamlığın qorunması üçün vacibdir. Sahurda kompleks karbohidratlarla zəngin qidalar (yulaf, tam taxıllar), zülallar (yumurta, pendir, qatıq) və faydalı yağlar (zeytun yağı, qoz-fındıq) qəbul etmək məsləhətdir.

İftar zamanı orqanizm uzun müddət ac qaldığı üçün mədəni yükləməmək vacibdir. İftara bir neçə xurma və su ilə başlamaq, daha sonra yüngül şorba və proteinlə zəngin yeməklərlə davam etmək tövsiyə olunur. Qızardılmış və ağır yeməklərdən uzaq durmaq həzm problemlərinin qarşısını alar.

Sağlamlığı qorumaq üçün nələrə diqqət etməliyik?

-Kifayət qədər su içmək: İftar və sahur arasında ən azı 2-2,5 litr su içmək vacibdir.

-Yuxu rejiminə əməl etmək: Gec saatlara qədər yatmamaq bədəni yorğun sala bilər.

-Fiziki aktivliyə diqqət etmək: İftardan sonra yüngül yürüş və ya idman etmək həzm sistemini rahatladar.

Oruc düzgün tutulduqda həm ruh, həm də bədən üçün faydalıdır. Sağlam qidalanma və düzgün vərdişlərə əməl edərək, Ramazanı daha rahat keçirmək mümkündür.