"PAŞA Real Estate Qrup" 1 May 2025-ci il tarixindən etibarən Elçin Qədimovun Qrupun Baş Kommersiya Direktoru (Group CCO) və Beynəlxalq Layihələr üzrə Baş İcraçı Direktoru (CEO of International Projects) vəzifələrinə təyin olunduğunu məmnuniyyətlə elan edir. Eyni zamanda, Tural Əliyev "PAŞA Property Management"in Baş İcraçı Direktoru (CEO) vəzifəsinə təyin edilmişdir.

Elçin Qədimov yeni vəzifəsinə daşınmaz əmlak və maliyyə xidmətləri sahələrini əhatə edən geniş rəhbərlik təcrübəsini gətirir. "PAŞA Property Management"in Baş İcraçı Direktoru vəzifəsindəki əvvəlki fəaliyyəti strateji təşəbbüslərə rəhbərlik, eləcə də təşkilati böyümənin idarə olunması, uğurlu nəticələrə gətirmişdir. "PAŞA Real Estate Qrup"a qoşulmazdan əvvəl bank sektorunda iyirmi ildən artıq yüksək rəhbər vəzifələrdə çalışaraq uğurlu bir karyera qurmuşdur. O, Cənubi Alabama Universitetindən MBA elmi dərəcəsinə malikdir.

Qrupun Baş Kommersiya İnzibatçısı rolunda Elçin Qədimov PAŞA Real Estate Qrupun yerli və beynəlxalq daşınmaz əmlak satışı əməliyyatlarına nəzarət edəcək və kommersiya funksiyalarını mərkəzləşdirəcək. Həmçinin E. Qədimov yerli və beynəlxalq bazarlarda hökumətlə əlaqələrə rəhbərlik edəcək, strateji tərəfdaşlıqların qurulmasına və tənzimləyici uyğunluğun təmin olunmasına töhfə verəcək. Beynəlxalq Layihələr üzrə Baş İcraçı Direktor vəzifəsində 2025-ci ilin mühüm investisiya layihəsi olan Özbəkistan və digər investisiya təşəbbüsləri daxil olmaqla beynəlxalq strateji inkişaf sahəsinə nəzarət edəcəkdir.

Rəhbərlik sahəsində 17 ildən artıq təcrübəyə malik Tural Əliyev "PAŞA Property Management" şirkətinin baş icraçı direktoru vəzifəsinə təyin edilmişdir. Daha öncə Tural Əliyev "PAŞA Sığorta" ASC-də baş icraçı direktorun müavini vəzifəsində çalışıb və burada əməliyyatların təkmilləşdirilməsi, müştəri təcrübəsinin yaxşılaşdırılması, eləcə də innovativ təşəbbüslərin həyata keçirilməsində mühüm rol oynamışdır. Tural Əliyev London Business School-un MBA dərəcəsinə və Carnegie Mellon Universitetinin İnformasiya Sistemlərinin İdarə Edilməsi üzrə CIO Sertifikatına malikdir.

Yeni vəzifəsində Tural Əliyev beşulduzlu xidmət mədəniyyətinin formalaşdırılmasını, aktivlərin planlı şəkildə idarə olunmasını, əməliyyat intizamına və maraqlı tərəflərin gözləntiləri ilə uyğunluğa diqqət yetirərək uzunmüddətli dəyər yaradılmasını təmin edəcək.

PAŞA Real Estate Qrup haqqında

PAŞA Real Estate Qrup, daşınmaz əmlakın investisiyası, inkişafı, strateji idarəçiliyi və istismarı üzrə ixtisaslaşmışdır. Azərbaycan, Türkiyə, Gürcüstan, Özbəkistan və Monteneqronun müxtəlif bölgələrində fəaliyyət göstərən qrup lüks hotellər, dünya səviyyəli kurortlar, ticarət obyektləri, premium yaşayış layihələri və qarışıq tipli layihələr daxil olmaqla geniş portfelə malikdir. Keyfiyyət, dürüstlük və müştəri məmnuniyyətinə sadiq qalan PAŞA Real Estate Qrup, sənaye standartlarını yenidən müəyyənləşdirmək və qlobal miqyasda aktivlərinin dəyərini artırmaq məqsədi ilə fəaliyyət göstərməkdədir.

www.pasharealestate.az