“Qarabağ və Şərqi Zəngəzuru işğaldan azad etməklə çox böyük bir prosesin əsasını qoyduq”.

Bunu “AVESTA.AZ”a açıqlamasında Milli Məclisin deputatı Fəzail Ağamalı deyib.

Prezident İlham Əliyevin doğum günlərini bir qayda olaraq Azərbaycan xalqı və dövlətimiz üçün ciddi mahiyyət daşıyan hadisələri ilə uzlaşdırdığını qeyd edən deputat bildirib ki, bu baxımdan sonuncu ad günü də istisna olmadı:

“Ölkə Prezidenti dekabrın 24-də - öz doğum günündə Qərbi Azərbaycan İcmasının bir qrup ziyalısı ilə görüş keçirdi. Prezident belə bir görüşün də keçirilməsini vacibliyini vurğulayaraq geniş bir nitqlə çıxış etdi. Cənab Prezident Qərbi Azərbaycan İcmasının binasını təsadüfən seçmədiyini diqqətə çatdırdı və vaxtilə Şuşa İcra Hakimiyyətinin, həmçinin Qarabağ İcmasının həmin binada yerləşdiyini bildirən ölkə başçısı artıq Qarabağ və Şərqi Zəngəzurun işğalına son qoyduqdan sonra Qərbi Azərbaycan İcmasının məhz bu binada yerləşməsinin həm rəmzi məna daşıdığını, həm də Azərbaycanın bütün bölgədə yaratdığı yeni reallıqları və hədəflərini ifadə etdiyini bildirdi”.

Onun sözlərinə görə, Prezident İlham Əliyev Qərbi Azərbaycanın tarixi Azərbaycan torpaqları olduğunu konkret faktlara əsaslandıraraq qeyd etdi ki, həmin torpaqlar ermənilər və onları himayə edənlər tərəfindən zaman-zaman ermənilərin işğalına məruz qalıb:

“Ermənilər həmin ərazilərə köçürüldükdən sonra orada yaşayan soydaşlarımız bir neçə dəfə deportasiyaya məruz qalmaqla yanaşı, onların taleyi etnik zəmində soyqırımı ilə müşahidə olunub. Tarix göstərdi ki, İrəvanın Ermənistana verilməsi ilə guya onların Azərbaycana qarşı ərazi iddialarından əl çəkəcəkləri düşüncəsi yanlışdır. Hətta, Azərbaycan xalqının rəyi, iradəsi nəzərə alınmadan Qərbi Zəngəzur da bolşeviklər tərəfindən Ermənistana verildi və tarixi ərazilərimiz parçalandı. Naxçıvanla Azərbaycanın ayrılmasından sonra böyük türk dünyası ilə Azərbaycanın tarixi bağları qopdu. Ölkə Prezidenti nitqində daha çox bu kimi tarixi həqiqətlər üzərində dayandı və bildirdi ki, növbəti faciəmiz Qarabağın, həmçinin Şərqi Zəngəzurun işğalı oldu. Əvvəlki ənənələrinə söykənən ermənilər Azərbaycan torpaqlarını işğal etməkdən çəkinmədi”.

Nəhayət, 44 günlük Vətən müharibəsində əldə edilmiş böyük zəfərlə erməni işğalına son qoyulduğunu xatırladan deputat nəzərə çatdırıb ki, biz bu zaman nəinki Qarabağ və Şərqi Zəngəzur işğaldan azad etdik, eyni zamanda çox böyük bir prosesin əsası qoyduq:

“Həmin proses qədim Azərbaycan torpaqlarında xalqımızın yaşamaq haqqının tanınması və reallaşmasıdır. Bütün bunları nəzərə alan Prezident İlham Əliyev böyük qayıdışın ayrı-ayrı detallarından bəhs edərək bildirdi ki, bu tarixi torpaqlarımıza sülh yolu ilə getmək istəyindəyik. Hesab edirəm ki, ölkə başçısı özünün məharətli diplomatik gedişləri ilə bu arzunu reallaşdırmaq istəyində və gücündədir”.

“Cənab Prezident son bir neçə ayda olduqca cəsarətli fikirlərini gündəliyə gətirir. Bir neçə müddət öncə üç dəfə - həm Türk Dövlətləri Təşkilatının Baş katibi ilə görüşündə, həm Səmərqənddə Türk Dövlətləri Təşkilatının Zirvə Toplantısında, həm də ADA Universitetində Beyin Mərkəzləri ilə keçirmiş olduğu toplantıda Güney Azərbaycanla əlaqədar çox ciddi fikirlər dilə gətirib. Bundan sonra Qərbi Azərbaycan İcması ilə görüşdə böyük cəsarətlə soydaşlarımızın öz ata-baba yurdlarına qayıtmasının tarixi gerçəklik və zərurət olduğunu önə çəkərək bütün dünyaya bəyan etdi. Bu, kifayət qədər ciddi və böyük missiyadır. Əminəm ki, bu tarixi missiyanın müəllifi və arxitektoru dünya şöhrətli dövlət xadimi Prezident İlham Əliyev və onun rəhbərliyi ilə Azərbaycan xalqı olacaq”,- F.Ağamalı vurğulayıb.