İran Prezidenti İbrahim Rəisi ABŞ hakimiyyətini Tehranın nüvə proqramı ilə bağlı münaqişənin həlli üçün hazırlanmış Birgə Hərtərəfli Fəaliyyət Planının (BHFP) gələcək taleyi ilə bağlı qərar verməyə çağırıb.

“Report” TASS-a istinadən xəbər verir ki, bu barədə dövlət başçısı BMT Baş Assambleyasının 78-ci sessiyası çərçivəsində keçirilən ümumi siyasi debatlarda çıxışı zamanı deyib.

“Birləşmiş Ştatlar öhdəliklərinə sadiqliyini nümayiş etdirməli və nəhayət, müvafiq yolu seçməlidir: bu, ya BHFP-nin bərpası, ya da yox”, - Rəisi bildirib.

İran Prezidenti ABŞ-nin nüvə sazişindən çıxmasını “biabırçı cinayət” və BMT Təhlükəsizlik Şurasının BHFP-nin şərtlərinin təhkim olunduğu 2231 saylı qətnaməsinin pozulması adlandırıb. Rəisi vurğulayıb ki, İranın hərbi doktrinasında nüvə silahına yer yoxdur, ona görə də Tehran özünün mülki nüvə enerjisinin inkişafı proqramının tərtibatına görə sanksiyalara məruz qalmamalıdır.

Xatırladaq ki, daha öncə Avropa İttifaqının (Aİ) xarici işlər və təhlükəsizlik siyasəti üzrə Ali Nümayəndəsi Josep Borel iranlı həmkarı Hüseyn Əmir-Abdullahianla görüşdə Tehranı Atom Enerjisi üzrə Beynəlxalq Agentliyin (AEBA) “bir neçə təcrübəli müfəttişinin akkreditasiyasını ləğv etmək qərarını yenidən nəzərdən keçirməyə” çağırıb.

Qeyd edək ki, 2015-ci ildə BMT Təhlükəsizlik Şurasının beş daimi üzvü və Almaniya rəsmi Tehranla İranın nüvə proqramı ətrafında böhranın aradan qaldırılmasına yönəlmiş Birgə Hərtərəfli Fəaliyyət Planı imzalayıblar. ABŞ-nin əvvəlki prezidenti Donald Tramp 2018-ci ildə bu sazişdən çıxmaq qərarına gəlib. Birləşmiş Ştatların cari prezidenti Cozef Bayden dəfələrlə Vaşinqtonu nüvə sazişinə qaytarmağa hazır olduğunu bildirib.